Shillong, K’Lyngkot 07
Ka Dorbar Shnong Golf Links ka la maham tyngeh ïa ki briew kiba leh dusmon ba ju wan ban theh khyndew bad bret ñuit ha shi lynter ka rud surok Golf links.
Haba kren sha ki nongthoh khubor ha ka sngi Balang u Bah Michael Hek, Rangbah Shnong jong ka Pynthorumkhrah-Golf links u la ong, ki rud surok Golf links mynta ki la kylla long kum ka jaka bret ñuit bad ki jaka theh khyndew jong ki briew khlem akor bad ong ba ka jingjaboh katei ka jaka ka la long sha ba palat.
U Bah Michael u la pynpaw ïa ka jingsngewbitar ïa ki briew kiba wan ban theh khyndew bad kiba pynlong jaka bret ñuit ha katei ka bynta jong ka shnong bad ha kajuh ka por u la maham tyngeh ruh, “Lada lap ïa kine ki briew kiba wan ban theh khyndew bad bret jaboh, ngin knieh syndon ïa ka kali bad ka kuna ba 1 lak tyngka kin hap ban siew, ym dei tang katta, ngin leh ruh da kaba tyngeh haduh ba kin da peiphang syndon.”
Nalor kata u la ong ba na ka liang ka shnong ka khlem shong kli kti haba ïadei bad kane ka bynta bad na ka por sha ka por ka la phah jingthoh sha ka DC bad u la ïathuh ruh ba u la ïakren ïa u SDO ka tnad PWD ba kin peit lem, hynrei kaba ïadei bad ka jingkhuid jingsuba hi, ka dei ka jingkitkhlieh jong ki paidbah ban sngewthuh ban shim ka jingkitkhlieh ban nym bret pathar ïa ki plastik bad ki jaboh harud surok.
“Ka madan Golf links ha ki por ba kham mynshuwa ka la ïoh ïa ka nam kum ka “Scotland of the East” bad ka dei kawei na ki jaka jngohkai kaba khring bha ïa ki nongwan jngohkai ba nabar ka Jylla, hynrei haba peit ïa ka jingjaboh jong ka ha kine ki sngi ka long ka jinglehraiñ” la ong u Bah Michael.
U Bah Michael u la ong, ka jingïoh leh mon palat ki paidbah ban bret pathar ïa ki jaboh kum ki plastik bad kiwei ka dei namar bym don ka jingpynshitom kaba khlaiñ na kata ka daw ki briew tangba la lait na phyllaw lajong kim kheiñkor shuh.
Shuh-shuh u la kyntu ruh ïa ki paidbah nongshong shnong bad ki paidbah ba leit ba wan da ki kali ban nym bret khlem akor ïa ki plastik bad ki jaboh jabaiñ, u la ban jur ruh ba ki paidbah ki dei ban pynkylla noh ïa ka rukom pyrkhat bad ban peiphang ban lah ban rat dyngkhong haba ïadei bad ka khuid ka suba.
