Shillong, K’Lyngkot 07
Ka jingwan jong ka surok bah ha ki thaiñ Upper Shillong shi bynta ka long ka jingkyrkhu bad ïarap haba ïadei bad ka jingjur ka jingdheng kali ha kitei ki thaiñ la ka long ïa ki nongleit nongwan kiba na nongkyndong bad na sor ruh kumjuh kiba ïaid lyngba katei ka surok, hynrei haba phai ha kawei ka liang kine ki jingkylla ki la wanrah pat ïa ka jingeh kaba khraw ïa ki nongdie soh harud surok, kiba ju shong die soh ha 3-Mile ha kaba ki la mad ïa ka jinghiar ka ïew ka hat.
Lah ban kdew ba ka jaka ba ju shongdie soh ki longkmie bad rangbah ha 3 Mile ka dei kawei ka jaka kaba ïaid ïew bha naduh ka por jong ka khlam Covid-19 ha u snem 2020 bad ka heh ïew bha ha kito ki por namar baroh ki nongleit nongwan khamtam ki nongwan jngohkai pyrthei ki ju hiar ban thied soh.
Ki don kumba 11 tylli ki dukan die soh kiba la plie ha katei ka thaiñ naduh kitei ki snem ba la dep.
Haba ïakren bad ki nongdie soh ki la ïathuh ba mynshwa ki lah ban pynmih pisa da ki hajar tyngka ha ka shi sngi hynrei mynta pat kim lah die shuh.
Ki la ong “Haba ka Sorkar ka la shna ïa kane ka Surok bah, ka lynti ka la pynphai noh na ka jaka kaba kham shapoh. Kane ka jingkylla ka la pynlong ïa ki dukan ban shong jngai noh na ka lynti ba ïaid ki kali”.
Shuh shuh ki la ïathuh ba ki kali kim ïaid shuh na ka surok barim, ka ïew ka hat ka hiar bha. “Mynta wat tang ban pynmih da ki spah tyngka ruh ka la eh shisha, kaba la pynlong ruh ïa ki soh ban pyut bad ka long kaba la pynsep ei namar ba ki dei artad ki soh kiba rem dor kiba wan na bar,” ki la bynrap.
Na ki 11 tylli ki dukan kiba don mynshwa, mynta la sah sa tang 6 tylli namar kiba bun ki la hap ban khang noh da ka jingbym don ïew hynrei ki don pat tang katto kattne ngut ban shong namar kim don lad shuh da kum wei pat.
Nalorkata, ki nongdie soh ki la pynpaw “Kumba ki long ki nongshong shnong, ki sngewkmen ban ïoh ïa ka surok bah kaba pynlait ïa ka jingdheng kali hynrei na ka bynta ka lad ïoh jingmyntoi ki donkam ban kynriah noh sha ka jaka kaba kham bit hajan kane ka surok thymmai ba dang shu shna”.
“Ngi dang ap haduh ban da pyndep pura ïa kane ka surok ban sngewthuh bha ïa ka rukom pynïaid kali, nangta ngin sa leit ban kyrpad ïa ki bor pynïaid ban ai jaka noh ïa ngi sha kawei ka jaka kaba bit ban die jingdie,” ong ki nongdie soh.
