Lucknow, Kyllalyngkot:
U Chief Electoral Officer u la ong ba ki la ïoh ïa ki phorm jingkheiñ briew na ka bynta ki 12.55 klur ngut ki nongthep vote na ki 15.44 klur ngut kiba la buh kyrteng kham mynshwa; kiba sah 18.70 percent, lane kumba 2.89 klur ngut ki nongthep vote, kim shym la lah ban rung ha ka thup jong ki nongthep vote, namar ka jingkynriah jaka ba neh, ka jingpynrung kyrteng bunsien, lane ka jingïap .
Ïa ka Draft Electoral Roll na ka bynta ka Uttar Pradesh la pynmih ha ka sngi Ba-ar hadien ka Special Intensive Revision (SIR), ha kaba 12.55 klur ngut ki nongthep vote ki la bat na ki 15.44 klur ngut kiba la buh kyrteng kham mynshwa, ong u Chief Electoral Roll (CEO) u Navdeep Rinwa ha ka sngi Ba-ar.
Kiba dang sah ki long 18.70 percent, lane kumba 2.89 klur ngut ki nongthep vote, kim shym la lah ban rung ha ka thup Draft namar ka jingkynriah jaka ba neh, ka jingpynrung kyrteng bunsien, lane ka jingïap, u la ong haba kren ha ka jingïalang bad ki nongthoh khubor hangne.
U Rinwa u la ong ba ka Election Commission ka la shim ïa ka jingkheiñ briew na man ki thliew ïing ha kaba ki phorm jingkheiñ briew ki dei ban pyndap bad soi da ki nongthep vote ne kiba ha ïing ha sem jong ki.
Katba ïa katei ka jingïalehkai la thmu ban kut ha ka 11 tarik u Nohprrah, ka jylla ka la pan sa 15 sngi hadien ba ka la ïohi ba ki kyrteng jong ki nongthep vote kiba bun, kiba don haduh 2.97 klur ngut, ki nang shah weng noh na ka thup jong ki nongthep vote. Kumta la pynjlan ïa ka por kheiñ briew haduh ka 26 tarik u Nohprah.
Katkum ka jingïathuh jong u CEO, na ki 15,44,30,092 ngut ki nongthep vote ha ka Electoral Roll ha ka 27 tarik u Risaw, 2025, la ïoh pdiang ïa ki Enumeration Form na ka bynta 12,55,56,025 ngut ki nongthep vote, kaba kot sha ka 81.30 percent jong ki nongthep vote.
Haba ai jingtip bniah halor ka jingweng noh ïa ki 2.89 klur tylli ki kyrteng na ka Draft List, u Rinwa u la ong ba 46.23 lak ngut ki nongthep vote (2.99 percent) la lap ba ki la khlad noh, katba 2.57 klur ngut ki nongthep vote (14.06 percent) ki la leit buhai shnong junom lane kim shym la don ha ka por ba pynshisha.
Sa 25.47 lak ngut ki nongthep vote (1.65 percent) la lap ba ki la pynrung kyrteng ha palat ïa kawei ka jaka.
“Ka Draft Electoral Roll mynta ka don 12.55 klur ngut ki nongthep vote bad ka kynthup ïa baroh 75 tylli ki distril bad 403 tylli ki Assembly konstitwensi jong ka jylla”, la ong u Rinwa.
Kane ka jinglehkai ka la kynthup ïa 1,72,486 tylli ki jaka thep vote, ha kaba ki ophisar kiba don ha ka kyrdan jong ki jaka thep vote ki trei ryngkat bad ki nongtrei mon sngewbha ban poi sha ki nongthep vote.
U CEO u la ong ba ka por ban dawa bad ban pyrshah kaba shibnai kaba la sdang naduh ka 6 tarik u Kyllalyngkot bad kan bteng haduh ka 6 tarik u Rymphang, ha kaba ki nongthep vote ki lah ban pan jingpynrung, jingpynbeit ne ban pynpaw jingpyrshah ïa ka Draft Roll.
