Shillong, K’Lyngkot 07
Ka Voice of the People Party (VPP) ka la ban biang ïa ka kular jong ka ban tynruh haba ïadei bad ka jingpynrung ïa ka Ktien Khasi ha ka Khyrnit ba 8 jong ka Riti Synshar ka Ri.
“Hooid, na ka bynta ban pynrung (ïa ka Ktien Khasi) ha ka Khyrnit ba 8, ka VPP kan ïai bteng ban ïakhun na ka bynta kane,” ong u nongaiktien ka VPP, Dr. Batskhem Myrboh.
U la ban jur ba ka Ktien Khasi ka ïaryngkat kyrdan bad kiwei-kiwei ki ktien jong ka thaiñ kiba la dep rung ha ka Khyrnit ba 8 – da kaba buh jingkylli ïa ka nongrim jong ka Sorkar Pdeng halor ka jingpynrung ïa ka.
“Lada ïa nujor ïa ka Ktien Khasi bad kiwei pat ki ktien na ka thaiñ kiba la shah kynthup, ka Ktien Khasi kam duna shuh, hynrei ngim tip kaei kaba don ha ka jingmut jong ka Sorkar Pdeng,” la pynpaw u Dr. Myrboh.
Kaba sngewtynnad ka long, u la bynrap ba ka ktien Mizo jong ka Mizoram, kaba la pyndonkam bha kum ka ktien Sorkar ne ‘Official Language’, ka dang sahteng ban ïoh rung ha ka Khyrnit ba 8, kaba pynpaw ïa ka jingsngewthuh ka bym ïahap ha ka rukom treikam jong ka Sorkar.
Ha kawei ka liang, u Dr. Myrboh u la kiar ban ong eiei halor ki jingpyrshang jong ka Sorkar Jylla, da kaba kdew ba ka jingdawa ka dei kaba la slem bah hashuwa jong ka bor synshar kaba mynta.
“Ha kaba ïadei bad ki jingpyrshang jong ka Sorkar Jylla, ngam lah ban ong namar kane ka dei ka jingdawa hok kaba la slem bah naduh ki Sorkar Congress ha ki por ba la dep bad wat kane ka Sorkar kumjuh,” u la ong.
