Adokgre, K’Lyngkot 07
U Myntri Rangbah ka Jylla, u Conrad K. Sangma ha ka Sngi Thohdieng u la pynshai ba ka jingpynslem ban pyndep ïa ka surok Rongjeng-Mangsang-Adokgre ka dei namar ki jyrwit-jyrwat, naba ka Sorkar barim ka la aplai ban shna surok na ar tylli ki skhim ba ïapher kiba hap hapoh ka tnad DoNER.
Ïa katei ka projek kaba T.200 klur tam la dei ban pyndep ha u snem 2020. Hynrei, ka tnad ka la pyndam noh ïa kawei na ki skhim namarba la aplai ha ki ar bynta na kajuh ka tnad.
“Ka tnad DoNER ka la lap ba ïa kane ka surok la aplai ha ki ar bynta hapoh ki ar tylli ki skhim ba ïapher jong kajuh ka tnad, bad hadien kata, la pyndam noh ïa kawei na ki skhim,” ong u Myntri Rangbah ka Jylla haba jubab ïa ka jingkylli jong ki paidbah ha ka jingïalang ‘CM Connect’ ha ka shnong Memilam, North Garo Hills.
U la pyntip ba ha kine ki khyndiat snem ba la dep, ka Sorkar Jylla ka la ïatreilang bad ka tnad DoNER lem bad ka tnad pla tyngka ka Sorkar Pdeng ban pyntikna ha ka ban pyndep ïa kane ka surok ba kongsan kaba pynïasoh ïa ka North bad East Garo Hills.
“Ngi la ïoh ïa ka jingmynjur ban pyndep ïa kane ka surok, bad yn bei pisa da ka ‘World Bank’,” u la bynrap.
Kane ka surok kaba 44 km ka dei u budlum na ka bynta baroh ki nongshong shnong bad kan ai jingmyntoi ym duna ïa 50,000 ngut ki briew na ki ar tylli ki konstitwensi jong ka Kharkutta bad Rongjeng.
Katba ka surok ba 22 km na Rongjeng (kham palat khyndiat) sha Nengkram ka la jan dep artad, hynrei kiba bun ki bynta jong ka surok ki dang sahteng khlem pat pyndep bad ka buh jingeh ha ka leit ka wan.
Ïa kane ka surok la mang ha u snem 2017 na bynta T.210 klur, ba la bei tyngka da ka NLCPR bad ka NEC. Hynrei ka North East Council (NEC) ka la weng noh na katei ka projek, da kaba shim lang ïa ka T.88 klur kaba (ka) la mang, kaba la pynduna pat ïa ka pisa jong ka projek sha ka T.123 klur tam.
Hashuwa ba ka NEC kan weng noh ïalade, jan baroh kawei ka surok la dep ban pynpra ban wanrah ïa ka bathymmai.
