Nongstoiñ, K’Lyngkot 08
Ha ka sngi Balang jong ka taïew ka Hynñiewtrep Youth Council ( HYC) Lai Lyngdoh Circle ka la leit ban ïakynduh bad ujor ha ka Deputy Commissioner (DC) jong ka West Khasi Hills ka Hema Nayak, IAS halor ki trok kit palat pud kiba ïaid lyngba ka surok Nongkhlaw – Nongkasen.
Ki nongïalam ka HYC ba kynthup ïa u President, samla Wandap Marwein bad General Secretary, samla Willbirthsoon Kharsyiemlieh ki la ong ba katei ka jingïaid jong ki trok kit palat pud kala buh jingma ïa ki jingkieng kiba don ha lynter katei ka surok khamtam ïa ka jingkieng Mawthungkper bad Mawkaton.
Shuh shuh ki la ong ruh ba ka jingïaid jong kitei ki trok ka buh jingma khamtam ïa ka jingkieng Mawthungper bad jingkieng Mawkaton kiba la sator bha bad na ka liang ka HYC ka kyntu ruh ïa ki kali ba kim dei ban kit palat haba ïaid lyngba katei ka surok.
Ki nongïalam ka HYC ki la ong ruh ba ha ka jingïakren bad ka DC, na ka liang jong ka, ka la kren shai ba kan sa shimkhia halor kane ka bynta, bad kala ong ruh ba kan sa ïakynduh ïa u SP ka district bad ha kajuh ka por ba kan sa ïakynduh ïa u Executive Engineer jong ka PWD ban ïakren ban mang pisa thymmai noh ïa kitei ki jingkieng.
