Shillong, K’Lyngkot 08
Ka kynhun ki runar ïa kiba ym lah ban tip ki dei kiei, ki la ïoh ban knieh ïa ki mobile phone bad ka pisa na ki lai ngut ki briew da kaba pynap pistol.
Katkum ka khubor kaba la ïoh lum na ki pulit la ong ba ha ka 6 tarik mynta u bnai, ha ka por kumba 3.30 janmiet, ki pulit ki la ïoh ka jingtip halor kawei ka jingjia jong ka jingkynnoh jong ka jingdon ka kam dawa pisa ha khlaw Banseng ha ka thaiñ Gambegre kaba hap hapoh ka thanad Araimile ha West Garo Hills.
La ong ba ha ka por ba ki pulit ki la pynlong ka jingtohkit, la lap ba ki san ngut ki runar bym lah ban ithuh, kiba la rah lang ka pistol bad ka wait, ki la pynbiej ïa ki lai ngut ki briew ba la tip kyrteng kum u Alauddin Sk (27 snem), u Hebellab Sk bad u Awil Sangma (47 snem) da kaba leh mynleh ban die noh ïa ki kwai ba la thep ha ki lai tylli ki pick-up bad la ïalam ïa ki sha ka khlaw Banseng.
Hynrei la ong ba ynda la poi ha katei ka khlaw, ki runar ki la knieh jubor ïa ka mobile phone jong kitei ki lai ngut bad ruh ïa ka pisa kaba kot sha ka T.1.48 lak da kaba pynap da ka pistol bad hadien ba ki la dep ban byrngem, ki la phet bak na katei ka jaka.
Ha kawei pat ka khubor, la ong ba ha ka 5 tarik mynta u bnai ha ka por kumba 9 baje mynmiet, ki pulit ki la ïoh jingtip ba ki saw ngut ki runar bym lah ban ithuh kiba la rah bad ka wait, ki la khang lynti ïa ki ar tylli ki arshaka ha surok Dawa Chipit, Nengkhra-Williamnagar ha East Garo Hills bad ban knieh jubor ïa kawei ka mobile phone bad ka pisa T.3,000/- na ka samla Sonia D Shira bad kawei ka mobile phone na u Septin D Sangma. La ong ba hadien kane, kine ki runar ki la phet bak noh na katei ka jaka.
