Shillong, K’Lyngkot 08
Ka Voice of the People Party (VPP) ka la kynnoh ba ka jingdon jong ka jingtih dewïong beaiñ kaba ïaid shakhmat ha Meghalaya ka dei da ka jingdonkti lang jong ki briew ba don ha ka bor.
“Kane ka dei ka rieh kaba paw shynna bad ha ka jingshisha, wat ka tnad bishar (judiciary) ruh ka la kynthoh tyngeh halor kane ka kam. Ka jingtih dewïong beaiñ ka la ïaid beit, bad ha kaba na ka liang jong ka Sorkar Jylla kham mynshwa ka la kyntait halor kane,” la ong u nongaiktien ka VPP u Dr. Batskhem Myrboh.
U la kdew ïa ka jingjia ha rilum Jaiñtia ha kaba kawei ka par dewïong ka la dap da ka um, kaba la pynpaw pyrthei ïa ki jingthok jong ka Sorkar.
“Nga ngeit ba khlem ka jingïadon bynta jong kito kiba don ha ka bor, ka long kaba eh ban don ka jingtih dewïong kumba ka paw bad kaba ka dang jia,” la bynrap u Dr. Myrboh.
U nongaiktien jong ka VPP u la pynpaw ïa ka jingsngewkhia ba watla ka don ka jingkhang tih dewïong, hynrei ka jingtih beaiñ pat ka dang ïai bteng, bad mynta, hapoh ka jingtap jong ka jingtih stad saian, ka jingtih dewïong kumba leh ha ki por kiba la leit ka lah ban dang ïai bteng, ka ban wanrah jingeh pat ban ïakhun pyrshah.
“Kaei kaba nga tieng ka long ba ha ka kyrteng jong ka jingtih katkum kane ka juk ne kata ka scientific mining, ka jingtih dewïong thliew khnai kan dang ïai bteng, bad kan long shisha kaba eh bha ban ïakhun,” ong u Dr. Myrboh, da kaba pynksan ïa ka jingdonkam ban pynjari aiñ kham pyrkhing bad ban long kiba shai ha ka liang ki kam tih marpoh khyndew.
