Shillong, K’Lyngkot 08
U MP barim ka Shillong bad uba dei ruh u President ka Meghalaya Pradesh Congress Com-mittee u Bah Vincent H Pala u la pynpaw ïa ka jingkyrshan jong ka Congress ïa ka jingtyrwa ban wanrah ïa ki lynti rel ha ka thaiñ Khasi-Jaiñtia, hynrei u la ban jur ïa ka jingdonkam ban don ka jingbishar bniah bad ka jingïatai ba sani bha.
Haba kren halor katei ka mat, u Bah Pala u la pynkynmaw ïa ka jingpyrshang jong u kum u Myntri (ha ka Sorkar Pdeng) ban ïoh ïa ka jingmynjur na ka bynta ka lynti rel sha ka thaiñ.
“Ha ka por ba nga dang long u Myntri, ngi la ïoh jingmynjur na ka bynta ka lynti rel na ka bynta ki rel kit mar, kaba thmu ban tehlakam ïa ka jingkiew dor jong ki mar bam mar dih,” u la ong bad bynrap “Ka jingpynrung ïa ki lynti rel ka dei kaei-kaei kaba kiba bun ki briew ki kwah bad kyrshan.”
U Pala u la pynpaw ïa ki jingeh kiba kum ka thaiñ ka ïakynduh mynta, kynthup ïa ki jingsiew ba heh palat ba la lum ha lynter jong ka surokbah.
“Ki don kumba 22 tylli ki khyrdop ha shilynter ka surok Assam sha Silchar, kawei pa kawei ka lum pisa T.500-1000 na ka bynta kawei ka trok, kaba ïarap ïa ka jingkiew dor jong ki marbam mardih ha Meghalaya,” u la ong.
Haba pynpaw ïa ka jingkyrshan ïa katei ka jingtyrwa, u Bah Pala u la ban jur ïa ka jingdonkam ban bishar bniah bad ban ïatai nia. “Ngi im ha ka synshar paidbah, bad lada kiba bun kim pdiang ïa ka, ngim lah ban pynbor ïa ka rai,” u la ong. “Ngin sa ïakren bad pyrkhat sani bha ïa ki jingdonkam, naba ka jingmut jingpyrkhat jong ki briew ka ïai kylla.”
U Bah Pala u la ai nuksa ïa ki jingkiew kiba la wanrah ha kane ka thaiñ, kynthup ïa ka jingbuh ïa ka kad liengsuiñ bad ki surok four-lane. “Ngan long uba kmen bha lada ngi lah ban wanrah ïa ki lynti rel na ka bynta ban kit ïa ki marbam mardih, ban pynduna ïa ka jingdheng kali ha surok bad ka jinglum khajna beaiñ,” u la ong. U la kdew ruh ba ka dor jong ki marbam mardih ka kham tad shibun ha Assam ban ïa kaba ha Meghalaya.
Da kaba pynpaw ba ki don ki jingmyntoi bad ki jingduhnong ban pyrkhat, u la ong ba ki sengbhalang ki la pynpaw ïa ka jingsngewkhia halor ka jingwan tuid ki briew ba nabar, hynrei da ki lad leit jingleit kiba mynta kum ki lynti rel, ki liengsuiñ, ki taksi, bad ki trok, ki briew ki la lah ban ïaid kylleng-kylleng da kaba suk.
“Kane ka mat ka donkam ïa ka jingïatai kaba bniah, bad ngim lah ban pynbor ïa ka rai kaba ktah ïa ka im bad ka ïap jong ki briew jong ngi,” u la ong.
