Shillong K’Lyngkot 08
Ka Synjuk Ki Nongdie Jaiñ Khasi Market, ka pynpaw ïa ka jingbym sngew ïahap ïa ka rukom shna shapoh bad ka jingkhim ki jingkhang ban rung ban mih ha ka jaka shong die jaiñ ba la pynkhreh da ka Sorkar ha Taxi Stand Jaïaw, Motphran.
Ka Kong Larisuk Rani, kaba dei ka Secretary jong ka Synjuk Ki Nongdie Jaiñ Khasi Market haba ïakren bad u Nongsaiñ Hima ka la pynpaw ïa ka jingbym sngew ïahap ïa ka rukom shna ba hapoh jong katei ka jingshna kaba long kum ka krem, namar ba la ker kut sbak khlem da don ki jaka pyllait lyer lane ki jingkhangïit ban ïoh jingshai.
Nalor kata ruh ka la ban jur haba ïadei ka jingkhim palat ka jingkhang lane ka jaka ban rung ban mih, da kaba ka la pynpaw ba ka jingshna ïa ka jaka ban rung ban mih ka long kaba khim shaba palat bad ka ban sa buh jingeh ïa ki ban ha ka ban kit ban bah ïa ki mar ki mata bad ki jingdonkam jong ki.
Shuh-shuh ka la ïathuh haba ïadei kane ka bynta ka Synjuk ka la leit ban ïakynduh bad aiti ïa ka jingthoh sha u Symbud Myntri Rangbah, u Bah Sniawbhalang Dhar ba khmih ïa ka tnad Urban Affairs, sha u CEO ka Municipal bad sha ka DC, ban pynpaw ïa ka jingdawa ba ka jingkhang ban rung ban mih ka dei ban long kaba bit ba biang bad ka rukom long rukom man hapoh ruh ka dei ban long kaba ïoh lyer kumba long ha ki por ba mynshuwa.
“Lada ka jingshna ka long ha ka rukom ba ka long mynta, ngin ym treh ban shong dukan hapoh bad ngi dei ban ïoh ban shong dukan ha jrong, lada ïa kiwei phi lah ban pynbiang, ïa ngi ruh phi hap ban pynbiang” la ong ka Kong Larisuk.
Ka Kong Larisuk ka la ban jur ba ka Sorkar ka dei ban pynbiang ïa ki jingdonkam kumba ka tnat Municipal ka la kular bad ong “Lada ka Sorkar kam lah ban pynbiang ïa ki jingdonkam, na ka liang jong ngi ngin ym treh ban leit shong dukan ha khrum jong ka parking bad lada ka Sorkar ka pynbor, ngi ki nongshong die jaiñ ngim banse ban pynlong da ka jingïakhih ban pyrshah.”
Haba bynrap ka Kong Sheba Nongbet kaba dei ka President jong ka SKNJM ka la ban jur ba ki jingkhang-ïit ki dei ban biang bad ka jaka ka dei ban long kaba shai ba kylluid ka leit ka wan kumba long ha ki por ba mynshuwa.
Ki la pynpaw ba ka Sorkar ka la kular ban pyndep noh ïa katei ka jingtei ha u bnai Kyllalyngkot 2026 bad ba kin ïoh leit shong die jaiñ biang kum ha ki por ba mynshuwa, hynrei ki la ong kumba ka paw bad ïohi ïa ka jinglong jingman ba mynta katei ka jingtei, ka Sorkar ka khlem lah ban pynurlong ïa ki jingkular jong ka.
