Shillong, K’Lyngkot 08
U Nongïalam ka Congress ha Meghalaya u Bah Vincent H Pala u la kynnoh ba ka Sorkar NDA ba la ïalam da ka BJP ha Delhi kan nym ai ïa ka Inner Line Permit (ILP) lane ki kor ki aiñ ba ïasyriem kum ka ILP ïa ka Jylla namar ka jingtlot palat ka Sorkar MDA ba la ïalam da ka NPP.
Haba kren sha ki lad pathai khubor ha ka sngi Palei, u Bah Pala u la ong, “Kane ka dei ka Sorkar kaba tlot, ka dei ka Sorkar kaba pyrkhat tang ka myntoi shimet, kim pyrkhat satia na ka bynta u paidbah, kumta ki dei kiba shah ïalam pura ha ka BJP. Ka BJP kan shu pynbiej ïa ki tang da ki jingkular hynrei kan nym ai eiei pat ïa ki.”
Haba pynpaw ïa ka jingartatien halor ka jingthmu jong ka BJP, u la ong, “Ka jingkwah jong ka BJP ha ka Jylla kum ka Meghalaya ka long kaba donkam bha. Kin ong ba kin ai ïa kane, katai hynrei kin nym ai eiei satia. Kumta ka long ka bym don jingmut ban ïakren ba kum kaei kata ka bill ka dei, lada phim don jingtip shaphang jong ka bad phim tip eiei, hynrei ki nang tang ban shu kren pynheh sha ki paidbah.”
Une u nongïalam ka Congress u la kynnoh ruh ïa ka Sorkar MDA ba ka bunkam tang ha ka ban pynthame ïa ki jingmut jingpyrkhat jong ki paidbah, da kaba ong, “Ha ka por Christmas bad Snem Thymmai, kane ka long tang ban pynthame ïa ka jingmut jingpyrkhat jong ki paidbah. Ka BJP kan nym ai eiei satia ïa ki. Ha ka por ba la leit, ka BJP ka la ong ïa ki ba kin plie noh ïa ka kam tih dewïong hynrei kim shym la plie satia. Ki la ong ba kin ‘amend’ noh ïa ka Sixth Schedule; hynrei ki khlem leh satia ïa kata… Kumno phin ngeit ïa kane ka Sorkar kaba mynta? Kaei kaei kaba ki ong bad kren kam don don eiei bad ki ong beit tang ïa kaei kaba ka BJP ka ong ïa ki ban kren.”
Shuh shuh u Bah Pala u la bynrap, “Ki paidbah ki la duh ka jingshaniah jong ki ha kane ka Sorkar. Ki la pynbna ïa kiba bun tylli ki Mission, hynrei kam shym la don eiei. Phim lah ban shaniah ïa kane ka Sorkar.”
