Srinagar, Kyllalyngkot:
Ka kynhun Counter Intelligence jong ki pulit ka Jammu & Kashmir ka la kem ïa 22 ngut ki briew ha ka sngi Balang hadien ka jingkhynra ha ki jaka bapher bapher ha kylleng ka them, la ong ki heh sorkar.
Ka kynhun Counter Intelligence Kashmir (CIK) ka la pynlong ïa ka jingtalasi ha kajuh ka por ha ki 22 tylli ki jaka. Kine ki kynthup ïa 17 tylli ki jaka ha Srinagar, lai tylli ha Budgam bad kawei kawei ha Shopian bad Kulgam distrik.
Ïa kine ki jingkhynra la pynlong da ka jingthmu ban pynpulom ïa ki lad jingïarap pisa jong ki kam thok ha ka Cyber bad ki kynhun lehnoh, kiba la pynpaw pyrthei ïa ka kynhun lehnoh kaba treikam ha kylleng ka them, la ong ki heh sorkar.
Ka CIK ka la shim ïa kane ka kam hadien ba ka la ïoh ïa ki hukum talasi na ka ïingbishar ba kyrpang jong ka NIA.Katkum ka jingong jong ki heh sorkar, kane ka jingleh ka dei ka jingshah pynshitom kaba khraw ïa ki kam runar ba la pynbeit ryntih bad ka jingïadei jong ka bad ka jingai pisa ïa ki lehnoh.
Ka CIK ka la pynjur ïa ka jingpynshitom beiñ ïa ka kynhun runar kaba pyndonkam ïa ki Mule Bank Account ban pynkhuid ïa ka pisa na ki kam thok ha ka Cyber, ka jingïalehkai ba long beaiñ lyngba kaba shu online, ka jingïathong be-aiñ kiba shu Online, bad kiwei kiwei ki kam be-aiñ.
Hadien ka jingwad bniah ba kyrpang, ki pulit ka CIK ki la ujor ïa ka mukotduma hapoh ki kyndon bapher bapher jong ka aiñ Information Technology Act, ka Bharatiya Nyaya Sanhita bad ka aiñ ïada ïa ki kam be-aiñ (Prevention) Act.
Ka jingtohkit ka la pynpaw ïa ka kynhun ki runar ba pynïaid ïa ka pisa kaba “stad bad kaba la pynskhem bha” kaba buh jingma kaba khraw ïa ka jingshngaiñ ka ïoh ka kot jong ka ri bad ka jingshngaiñ ha ka digital.Ka jingtohkit ba nyngkong ka la ïalam sha ka jingithuh ïa ki 22 ngut ki suba ha ka Kashmir Division.
Ha ka jingtalasi, ki pulit ki la kurup ïa ki tiar kiba lah ban pynngat ha ka aiñ, ki tiar Digital bad ki kot ki sla jong ka pisa tyngka.
Ïa kine ki 22 ngut ki briew la shah kylli jingkylli ban pynshisha ïa ka bynta jong ki ha ki kam thok ha ka Cyber, ki jingïalehkai be-aiñ, ki jaka ïalehkai bad ki jingïalehkai pisa kiba don jingsuba sniew.
Ki jingtohkit haduh mynta ki la pynpaw pyrthei ïa ka jingthmu ha kaba u nongshah kynnoh u la ïatreilang bad ki nongtrei trai ri bad nabar ban pyndonkam bakla ïa ki Bank Account jong ki briew kiba rit paid bad kiba tlot ha ka liang ka ïoh ka kot.
Ïa kine la pynkylla sha ki ‘Mule account’ ban pynkynriah ïa ki pisa beaiñ kiba bun na ki jingleh thok, ki jaka ïalehkai ba la khang pyrshah, bad ki aplikeshon bei tyngka thok.
Ki heh sorkar ki suba ba ïa kine ki pisa ba la pynmih beaiñ la pyndonkam sha ka jingai pisa ïa ki lehnoh bad kiwei kiwei ki kam kiba pynsniew ïa ka jinglong trai bad ka jinglong ba janai jong ka jaitbynriew.Ka kynhun ka la treikam da kaba pynkheiñ ïa ki kyndon jong ki Bank bad pyndonkam bakla ïa ki rukom treikam jong ka KYC.
Ki la pynrung kyrteng ruh ïa ki jaka treikam bym pat don lypa ha ka portal UDHAYAM ban plie ïa ki Account bad ki la pyndonkam da ki Virtual Account Number, ka jingtuh ïa ka jingithuh bad ki buit thok pisa ban buhrieh ïa ka tynrai jong ka jingwan ka pisa, la bynrap shuh shuh ki heh sorkar.
