Shillong, K’Lyngkot 08
Kawei ka ïing kaba don ha Mawkynroh-Umshing Block 3-B, kaba sah da ka Kong Pynhunlang Wanniang ka la pluh bad julor lut ki jingdon jingem baroh, kaba la jia ha ka miet jong ka 6 tarik mynta u bnai ha ka por 8:30 mynmiet.
Haba ïadei bad kane ka jingjia, u MLA barim, Bah PT Sawkmie hadien ba u la ïoh jingtip u la leit sha kane ka jaka ba jia bad khmih da la ki jong ki khmat bad ban noh jingïarap da ka song pisa sha kane ka longïing kaba la mad ïa kane ka jingsngewsih kthang.
La ïathuh ba ka Kong Pynhun ka don lai ngut ki khun kiba dang 8, 5 bad 3 snem tam eiei bad ka im da kaba shu bylla kynta ha ïing ki briew.
Haba pynpaw ïa ka jingsngewlem, u Bah PT Sawkmie u la pynpaw ba kum kine ki jingjia kim dei ki plan ne jingthmu U Blei, hynrei dei ki kam u soitan uba pynjot.
Kumta kum ki briew ba mad ïa kum kine ki jingjia ba sngewsih ki hap ban duwai bad ban jan sha U Blei.
Ha kane ka jingleit noh jingïarap la ïadon lang u Secretary Shnong Mawkynroh Umshing Bah L Diengdoh, Rangbah Dong Block 3-B Bah D Marwein, bad ka hynmen ka Kong Pynhunlang ka Kong Rishalin Wanniang, kiba la ai jingkren bad ai khublei ïa baroh kiba don bynta ban ïarap ha kane ka jingjia.
