Dehradun, K’lyngkot:
Ka Uttarakhand High Court ha ka sngi Ba-ar, ka la ai jingpyllait patok ba shipor ïa u MLA barim ka BJP, u Suresh Rathore, uba la shah kynnoh halor kiba bun jait ki kam beaiñ, hadien ki durkhih kiba la pynkulmar jingmut, kiba la pur stet na ka jingpyllait paidbah da ka aktres ka Urmila Sanavar.
Kane ka jingpyllait na ka bynta u Rathore ka wan ha ka por ba u la ujor sha ka Uttarakhand High Court ban pynsangeh noh ïa ka jingshah kem jong u ha ki saw tylli ki mukotduma ba kongsan ba la mudui pyrshah ïa u ha Dehradun bad Haridwar.
La ujor mukotduma pyrshah ïa ka Rathore ha Bahadarabad bad Jhabreda police station ha Haridwar, bad ha Nehru Colony bad Dalanwala police station ha Dehradun.
“Hadien ka jingbishar ha ka sngi Ba-ar, ka Uttarakhand High Court ka la ailad ban pynsangeh ïa ka jingkem ïa u Suresh Rathore ha baroh saw tylli ki mukotduma ba la mudui,” la pynthikna ka tyllong khubor kaba tip bha ïa ka jingbishar.
La kynnoh ba u Rathore bad uwei pat u briew uba shah kynnoh ki la thmu ban pynsaphriang ïa ki jingthoh kiba lamler bad kiba ïalam bakla ha ki Social Media da ka jingthmu ban pynbudnam sniew ïa u Dushyant Kumar Gautam.
U Rathore u la kyntait ïa ki jingkynnoh baroh bad u la kam ba u la shah pynrem ha ka jingpynshitom beiñ ïa ka saiñ pyrthei.
Utei u riew saiñ pyrthei u la kynnoh ruh ba ka Urmila kaba la shah kynnoh lang kam dei ka kurim jong u kaba la shongkurim katkum ka aiñ bad ba ïa katei ka jingthoh kaba la saphriang bha la thaw da kaba pyndonkam da ka jingstad thymmai khlem ka jingdonkti jong u.
U Advocate Vaibhav Chauhan, uba mih na ka bynta u nongmudui ha kashari, u la kynthoh ba ym shym la pynlong kano kano ka jingleh be-aiñ katkum ki kyndon 248(B) bad 336(4) jong ka Bharatiya Nyaya Sanhita namar ba u nongmudui um shym la sdang ïa kano kano ka kam pynshitom beiñ kaba thok lane leh ïa kano kano ka kam thombor.
Man kawei pa kawei ka ejahar kaba ïadei ha kum kine ki kam beaiñ la mudui pyrshah ïa u Rathore ha Haridwar bad Dehradun distrik.
Haba pyrkhat ïa ki jingkynthoh, ka kynhun nongbishar jong u nongbishar ba marwei jong u Justice Ashish Naithani ka la ai ‘jingïada shipor’ ïa u Rathore bad pynsangeh ïa kano kano ka jingpynbor pyrshah ïa u ha ka ejhar.
Hadien ka jingsaphriang jong ki durkhih jong ka Urmila Sanavar, u nongïalam ka BJP u Dushyant Kumar Gautam u la shah ring sha ki jingïakren kiba ïadei bad katei ka jingshah pynïap. Ha ka sngi Balang, ka ïingbishar ka la pynmih ïa ka hukum kaba kongsan ha ka liang jong u.
“Ka Delhi High Court ka la bthah ba baroh ki jingthoh kiba saphriang ha ki Social Media kiba pynïadei ïa u nongïalam ka BJP u Dushyant Gautam bad ka mukotduma jong ka Ankita Bhandari dei ban weng noh hapoh 24 kynta,” la ong u nongaiktien jong ka sorkar.
Hapdeng kine ki jingpyntreikam jong ka aiñ, ka liangpyrshah ka la pynjur ïa ka jinghiar thma ïa ka sorkar jylla ha kaba ïadei bad ka jingpynïaid ïa ka jingtohkit halor ka jingshah pynïap ka Ankita Bhandari.
Haba kren sha ki lad pathai khubor ha Congress Bhawan, u President ka Uttrakhand Congress u Ganesh Godiyal u la kynthoh jur ïa ka bor synshar.
“Nyngkong, la pynduh pyndam ïa ki sakhi ha ka mukotduma pynïap ïa ka Ankita, bad mynta ka sorkar ka dawa ïa ki sakhi,” ong u Godiyal.
U la pynpaw ïa ka jingdawa kaba dang ïaid shakhmat na ki kmie ki kpa jong ka Ankita na ka bynta ka jingtohkit jong ka CBI, da kaba kdew ba ka sorkar jylla kam shym la lah ban rai ïa kane ka sienjam kaba kongsan ha kine ki lai snem ba la dep.
Ha ka jingpyni ïa ka jingïatylli, ka jingïaid kjat ‘Nyay Do’ (Deliver Justice) ka la poi ha ka nongbah Gopeshwar ha kaba sdang jong kane ka taïew. Ha ka jingïalam jong u Godiyal, ki nongtrei ka Congress ki la ïaid paidbah haduh jan shi kilomitar, da kaba dawa ïa ka jingkitkhlieh.
“Kane ka jingïakhun kan ïai bteng haduh ba ka Ankita Bhandari kan ïoh ïa ka jingbishar bahok,” la pynskhem u Godiyal ha ki paidbah kiba la ïa risa.
