Shillong, K’Lyngkot 08
U Bah Moslander Marngar uba dei u Chairman ka Meghalaya Commercial Truck Owners and Driver Association (MCTODA) u la pynpaw ba ka long ka jingkyrkhu namar ka ïingbishar Meghalaya High Court ka la ai ïa ka jingbishar ban bthah ïa ki kompani pynmih dewbilat ban siew phra tyngka ïa ka bai kit sha ki trai trok.
U Bah Moslander u la ïathuh ba kine ki kompani pynmih dewbilat ha East Jaiñtia Hills ki la leit ujor sha ïingbishar Meghalaya High Court ha ka 16 tarik u bnai Nohprah 2025 bad ha ka 17 tarik ka ïingbishar ka la ai ïa ka rai.
Shuh shuh u la ïathuh ba kine ki kompani ki leit kyrpad sha ka ïingbishar ban phah hiar sha ka hynriew tyngka haduh hynñiew tyngka ka bai kit dewbilat ban pyrshah ïa ka rai ba la pynmih da ka Sorkar Jylla ban siew bai kit khyndai tyngka hynrei ka ïingbishar ka la shim noh ïa ka dor pdeng kata ban pynskhem noh ïa ka phra tyngka.
U la pynkynmaw haba ka Sorkar Jylla ka la pynmih ïa ka jingpynbna ba ki kompani kin siew khyndai tyngka shi kilometre ban leit buh ïa ka dewbilat, kine ki kompani ki khlem pyntreikam hynrei ki leit pynban sha ka ïingbishar.
Shuh shuh u la pynpaw ka jingsngewkmen haba ki la leit sha ïingbishar, ka la ai pynban da ka rai ban phah siew phra tyngka kaba long ruh ka jingkyrkhu ïa ki.
U la ïathuh biang ba ïa kane ka phra tyngka kaba ka ïingbishar ka la dep rai, ki trai trok bad ki nongñiah trok kin sa leit ban ïashong jingïalang bad ki trai kompani ha ka 12 tarik mynta u bnai.
U Bah Moslander u la ong ba ha kane ka jingïakynduh kin dawa beit ba ki kompani kin siew beit ïa ka dor ba la buh da ka ïingbishar lada kim siew, ki la don ka hok ban ïakhih.
Shuh shuh u la pynpaw ka jingsngew bynñiaw ba ïa ka dor khyndai tyngka kaba ka Sorkar ka la buh ka long tang ha Meghalaya katba lada leit shabar ka jylla la phah kit ha ka dor kaba tad kata ruh hap ïaid ïa ka surok Meghalaya.
Ha ka juh ka por u la pyntip ba ka MCTODA kan pynlong ïa ka jingïalang paidbah lashai ka sngi ka 9 tarik Kyllalyngkot 2026 ha Baniun, Upper Shillong ban ïakren ïa bun ki kam.
