Shillong, K’Lyngkot 08
Ki paidbah kiba leit ba wan bad kiba shong dukan ki la leit ban ai jingkyrshan ïa ki ar ngut ki samla kynthei kiba la wan shad ha Motphran kum shi bynta ban pan jingkyrshan ïa ka phlim “Tang shiteng por” ka ban sa pyni ha Bijou Cinema Shillong naduh ka 9 tarik mynta u bnai Kyllalyngkot.
Kine ki ar ngut ki samla ki dei kiba la tip kyrteng, ka Saralin Mawlong bad Mercyful Lyngkhoi na Ri-Bhoi ki la la pynpaw ba kim don ka jingsngew lehraiñ ban shad hakhmat ki paidbah kiba ïaid ba ïeng ha Motphran namar ki wan ban pan jingkyrshan haba ka phlim “Tang shiteng por” yn sa pyni ha Bijou Cinema Shillong.
Kine ki samla kynthei kiba la wan shad ha Motphran ki dei ruh kiba la shad ha ka music video jong ka phlim ‘Tang shiteng por’ kaba la ai kyrteng “Khun ïoh mon” kaba la dep pyllait ha Youtube LS Syiemlieh Production.
Ha kane ka sngi la ïoh ruh ka jingrwai da u Bah Anthony Khyriem uba dei u nongrwai jong kane ka phlim bad la ïoh jingkren da u Bah Lansius Syiemlieh uba dei u tyngshop bad u trai jong ka phlim.
Hadien ba la dep ka jingshad bad ka jingrwai kine ki ar ngut ki samla kynthei ki la ïoh ban sam ei ïa ki tiket ïa ki paidbah ba kin wan peit ïa ka phlim ‘Tang shiteng por’ ha Bijou Cinema Shillong ha ka sngi sdang kaba dei ka 9 tarik mynta u bnai.
Haba ïakren bad kine ki samla kynthei hadien ba ki la dep shad, ki la pynpaw ka jingsngewkmen haba ki paidbah ki wan ban ai jingkyrshan haba ki shad ha Motphran kumta ki la khot ïa ki paidbah ban wan ai jingkyrshan sha Bijou Cinema.
Shuh shuh ki la ïathuh ba ha kane ka jingrwai ka puron Assamese ka la shad lang bad ka lah ruh ban rwai da ka ktien Khasi.
