Shillong K’Lyngkot 08
U Superintendent of Police ka East Khasi Hills District u Bah Vivek Syiem haba ïakren sha ki nongthoh khubor ha ophis treikam jong u ha ka sngi Palei, u la ïathuh ba ka naduh ba la pynmih ïa ka jingpynbna ba la khang ïa ki kali tah ïit-ïong, ka tnat pulit ka la pynlong ïa ka jingpeitngor ïa ki kali kiba tah ïit-ïong ha nongbah Shillong bad ki khap sor.
Ha ka jingtalasi ki bor pulit ha ka District ha kine ki khyndiat bnai ka tnat pulit ka la ïoh ban bat palat 300 tam ki kali.
U Bah Vikek u la ïathuh ba ki pulit ki la daiñ kuna na kine ki kali haduh T.2,64,500 bad ka tnat ka dang ïai bteng ban pynlong ïa ka jingtalasi ïa ki kali ba pynkheiñ ïa ki kyndon aiñ na ka por sha ka por, khamtam ha ka por janmiet.
Na ka liang u SP u la kyntu ïa ki paidbah ba kim dei ban pyndonkam ïa ki ïit-ïong kumba la dep ban mana da ki bor jong ka aiñ.
Haba ïadei ki kali kiba buh ïa ki ‘light’ ba thaba, u Bah Vivek u la kyntu ïa ki paidbah ban weng noh bad ban ym pyndonkam namarba ka ktah bad pynthut ïa kiwei pat ki kali bad poi ruh haduh ban ïa tyngkhuh kali.
Haba ïadei pat bad kito ki arshaka kiba pynher sted, ki bym phong helmet, kiba ïaid na ka lynti bym dei, kaba buh jingma ïa kiba ñiah kali khamtam ïa ki briew kiba ïaid lynti, u SP u la ïathuh ba ka tnat pulit ka peit pyrman bha lyngba ki kor CCTV ha kylleng sawdong bad lada ki lap bad ïohi ïa kum kine ka tnat kan sa shim ïa ki sienjam kiba tyngeh ha ryngkat ka kuna.
