Nongpoh, K’Lyngkot 08
Ki runar kiba ym lah satia ban tip ne ithuh ki la leit ban law bad tuh ïa kumba 27 tylli ki pipe um kiba dei na ka skhim Jal Jeevan Mission (JJM) kiba pynpoi um bam um dih sha ki ar tylli ki shnong ba kynthup ïa ka Jorbil bad Umlangpur.
Katkum ka tyllong khubor ba la ïoh lum, la ïathuh ba kane ka jingshah tuh jong kitei ki pipe um kala paw pyrthei hadien ba ki nongïalam shnong ki la pynlong ïa ka jingleit jurip ïa ka tyllong um halor ka jingujor jong ki paidbah nongshong shnong kiba la ud la nam halor ka jingkyrduh um bam um dih.
Kane ka jingshah tuh jong kitei ki pipe um kala wanrah ïa ka jingkyrduh um bad buh jingeh shikatdei ïa ki paidbah nongshong shnong jong ka Jorbil bad Umlangpur.
Halor kane ka jingjia, na ka liang ka shnong kala ujor ruh da ka ejahar ha thanad Khanapara na ka bynta ban thwet bad pynshitom ïa ki runar kiba donkti ban tuh ïa kitei ki pipe um.
