Shillong K’Lyngkot 08
Ki taïew lehkmen jong u snem 2025 ka pher bha lada ïa nujor bad ki jinglehkmen ha kiwei pat ki snem kiba la dep.
U Superintendent of Police jong ka East Khasi Hills District u Bah Vivek Syiem haba ïakren bad ki nongthoh khubor halor ka jinglehkmen Khristmas bad snem thymmai mynta u snem u la ong u snem 2025 u dei u snem uba ym don kino-kino ki jingjia ba sngewsih.
U la ong ki jinglehkmen Khristmas bad snem thymmai mynta u snem ka ïa pher bha lada ïa nujor bad ki snem ba la dep, ki jinglehkmen ki ïaid beit ïaid ryntih khlem kino-kino ki jingjia.
U la bynrap da kaba ong ba ka tnat pulit ka thrang ban ïohi ba ka jinglehkmen ha kine ki snem ban wan ruh kan long kumba long mynta bad kin ïai-trei shitom shuh-shuh ha ki por ki ban wan.
Shuh-shuh u la ïathuh ruh ba ka tnat pulit ka sngewdap ram ïa ki pulit kiba hap ban trei (duty) ha kine ki sngi rakhe lehkmen ïa ka Khristmas bad ha ka jingrakhe lehkmen ban pdiang ïa u snem thymmai. Kumta ka tnat ka la shim ïa ka rai ban pynkupburom ïa baroh ki pulit ba longtrei ha kitei ki sngi.
