Shillong, K’Lyngkot 08
U President ka Meghalaya Pradesh Congress Committee (MPCC) u Bah Vincent H Pala u la pynbna ba ka seng ka la rai ban sdang da ki prokram ïakhih kynthup ka jingshah thngan ban pyrshah ïa ka Sorkar Pdeng ba ïalam da ka Bharatiya Janata Party (BJP) kaba la wanrah da ka Viksit Bharat Guarantee for Rozgar and Ajeevika Mission (Gramin) (VB-G RAM G).
Lah ban kdew ba ka Sorkar Pdeng ka la wanrah da ka VB-G RAM G ban bujli kyrteng ïa ka Mahatma Gandhi National Rural Employment Guarantee Act-2005 (MGNREGA) kaba dei ka skhim bylla 100 sngi.
Haba kren sha ki lad pathai khubor u Bah Pala u la ong ba ka MPCC ka la ïakren sani bha haba ïadei bad ki sienjam ban shim na ka bynta ban ïakhih ha baroh kawei ka Jylla Meghalaya ban pynsngew ïa ka jingpyrshah ïa ka VB-G RAM G.
U Bah Pala u la ïathuh ba ka Congress kan pynlong ïa ki jingïakhih ha baroh kawei ka ri India pyrshah ïa ka BJP kaba la rai ban pyndam noh ïa ka skhim MGNREGA.
“Ka MPCC kan pynlong ki jait prokram jingïakhih naduh ka 12 tarik u Kyllalyngkot ter-ter haduh 25 tarik u bnai Rymphang 2026 ha kylleng ka Jylla Meghalaya ban pyrshah ïa ka Sorkar BJP kaba la thmu pyndam noh ïa ka skhim MGNREGA” la ong u Bah Pala.
U Bah Pala u la ong ba ka Sorkar Pdeng ba ïalam da ka BJP ka pyrshah jur ïa ka kyrteng jong u Mahatma Gandhi bad ka kwah ban pynsngew pher jaidbynriew namar kata ka kwah ban pynduh noh ïa ka skhim MGNREGA.
U Bah Pala u la ong ba ka VB-G RAM G ka thmu ban knieh noh ïa ka hok ïoh kam bylla sngi jong ki paidbah khamtam na ki longkmie ha ki thaiñ nong kyndong.
Shuh shuh u la ong ruh ba ka VB-G RAM G kam pynthikna ïa ka hok ïoh kam hynrei mynta ka kynti ka jingïoh kam lyngba ka VB-G RAM G kan dei beit thikna katkum ka jingai jingmut ka Sorkar Pdeng.
“Mynshwa lyngba ka skhim MGNREGA ki paidbah ki lah ban dawa kam bad ka Sorkar hapoh 15 sngi kadei ban ai kam bad lada kam lah kadei ban siew ka bainong hynrei mynta lyngba ka VB-G RAM G ka Sorkar Jylla ka hap ai kam katkum ka jingmang tyngka ka Sorkar Pdeng” u la bynrap.
“Ka MPCC kan pynlong ki prokram ïakhih shah thngan ha baroh ki District bad kiwei ki jait prokram ïakhih ha baroh kawei ka Jylla” la ong u Bah Pala.
