Shillong, K’Lyngkot 08
Ki nongrwai Rock band ba pawnam na Germany ba la tip ka ‘Scorpion’ ki la pynbna ba kin wan biang sha India ban kiew ha ki rynsan kaba ki khot Coming Home tour 2026, kaba kdew ba kane ka band ka la ap khmih lynti ban wan namar hadien kumba 20 snem eiei kan wan biang sha ri India.
Kane ka jingwan jong ki sha India ka kdew shai ba ka long kaba kongsan bad kaba don jingmut bad ka kabu ksiar ïa ki riew ïeid jingrwai, kaba pyni bad kdew shai ïa ka jingkiew kaba kongsan ha kane ka jingwan ‘tour’ ba kylleng jong ki.
Ka jingwan jong kane ka kynhun kaba la pynbeit bad ïalap da ka BookMyshow, kan sa wan ban rwai ha ki 4 tylli ki Nongbah ha Ri India ha u bnai Iaiong, kata ha JN Stadium, Shillong ha ka 21 tarik, ha HUDA Ground, Delhi ha ka 24 tarik, ha NICE Ground, Bengaluru ha ka 26 tarik bad ha JIO Garden, Mumbai ha ka 30 tarik.
Ka jingïathied tiket shwa (Pre-Sale) jong ki Artist kan sdang ha ka14 tarik u Kyllalyngkot ha ka por 12 baje noh phai sngi (Noon), nangta yn bud da ka Pre-Sale kaba kyrpang na bynta ki Kotak Mahindra Bank Credit Card Customers ha ka 15 tarik ha ka por 12 baje nohphaisngi (Noon). Ka jingdie ïa ki tiket paidbah pat kan sdang naduh ka 17 tarik Kyllalyngkot ha ka por 1 baje bad yn ïoh thied tang lyngba ka BookMyShow.
U Klaus Meine u ong, “Ngi sngewkmen shibun eh ban sa leit ‘tour’ biang sha India hadien ka por kaba slem bha, bad ngi khmih lynti eh ban ïakynduh bad ki paidbah nongkyrshan jong ngi kiba bun bha ha India. Ki concert ruh kin long ka jingïakynduh kaba kyrpang eh na bynta jong ngi.”
Ïa kane ka jingwan sha India, kane ka kynhun ka la khot da ka Coming Home Tour-2026, ban kdew ïa ka jingwanphai biang kane ka kynhun ban rwai ha ri India hadien kumba 20 snem eiei.
Ka ‘Scorpion’ ka dei kawei na ki kynhun rwai bad tem kaba pawnam bha ha ka History. Ïa kane ka kynhun la seng ha u snem 1965 da u nongtem Guitar, u Rudolf Schenker, ha kaba ki jingrwai jong kane ka kynhun ki la khring shibun ïa ki paidbah nongkyrshan ba kynthup ïa ka ‘Rock You Like a Hurricane’, ‘Still Loving You’, ‘Send Me an Angel’, Wind of Change’, ‘Love at First Sting’, ‘Blackout’ bad ‘Crazy World’.
Na ka bynta ki tiket bad ki jingtip kiba kham bniah ki paidbah ki lah ban peit na ka www.the scorpions.com bad www.bookmyshow.com.
