New Delhi, K’lyngkot:
Ka ïingbishar jong ka Delhi ha ka sngi Thohdieng ka la pynngat ïa ka jingkynnoh bamsap bad ka jingïasuh buit sniew pyrshah ïa u Myntri Rangbah barim ka Bihar, u Lalu Prasad Yadav, ka kurim jong u, ka Rabri Devi, ki khun shynrang bad kynthei, ha ka kam bam klop lyngba ka jingïapeiñ jaka bad ka jingai kam, ha kaba la ong ba u Yadav u la pyndonkam ïa ka tnad rel kum ka lad ka kabu ban leh ïa ki kam beaiñ ha ka por ba u dang long u Myntri ka sorkar pdeng.
U nongbishar ba kyrpang jong ka Rouse Avenue Court, u Vishal Gogne, haba pule da ka ktien, na katei ka hukum, u la ong, “U A-1 (u Lalu Prasad Yadav) u la pyndonkam ïa ka tnad rel bad ka ophis jong ki jaka kum ka jaka riew shimet…U Yadav bad ki nongïarap ba jan jong u, ki treikam kum ka kam runar ban knieh ïa ki jaka”.
Ka ïingbishar ka la bynrap ruh ba katei ka kot mudui ka la pynpaw ïa ka jingthmu ba la khluit bha ha kaba ïa ka kam paidbah la pyndonkam da u Yadav kum ka lad ïakren ban ïoh ïa ki jaka da kaba bha ha ka kyrteng jong ki dkhot jong ka longïing jong u, kynthup ïa ki khun shynrang u Tejashwi bad u Tej Pratap Yadav, ka kurim jong u, ka Rabri Devi bad ka khun kynthei ka Misa Bharti.
Ha kajuh ka por, ka ïingbishar ka la ïaid shakhmat ban pyllait ïa ki 52 ngut ki briew kiba shah kynnoh, kiba kynthup ïa ki Central Personnel Officer (CPOS), bad baroh kiwei pat ki nongbujli ki bym shym la donkti ha kaba ïasam jaka beaiñ.
Ïa kane ka mukotduma la mudui da ka CBI ha ka 18 tarik u Jymmang, 2022, pyrshah ïa u Prasad bad ki bahaïing hasem jong u, da kaba kynnoh ba u Prasad, ha ka por ba u dang long Myntri ka tnad rel jong ka sorkar pdeng hapdeng u snem 2004 bad 2009, u la sam ïa ki kam jong ka kynhun D ha ki zone bapher bapher jong ka lynti rel bad ïoh kylliang da ki jaka na kito ki nongwad kam ha ka kyrteng jong ki dkhot ka longïing jong ki bad kiwei pat kiba la ïadonktilang.
Na ki nongshah kynnoh kiba dang sah, la pynngat mukotduma pyrshah ïa 41 ngut, katba san ngut ki la khlad noh ha ka por ba dang ïaid ka jingbishar ha ka ïingbishar.
Ha ka mukotduma jong ka, kaba la mudui hakhmat ka ïingbishar jong ka nongbah Delhi ha u snem 2023, katei ka tnad, ka la jer kyrteng ïa ki 78 ngut ki briew kiba shah kynnoh, ba kynthup ïa 30 ngut ki heh sorkar, kiba don jingïadei bad ka tnad rel.
Da kaba pynshong nongrim ha ka mukotduma jong ka CBI, ka ED hadien kata ka la mudui ïa ka mukotduma jong ka jingpynkylla pisa bad ka la aiti ïa ka kot mudui ha u snem 2024, da kaba jer kyrteng ïa u Yadav bad ki bahaïing jong u napdeng kiwei pat kiba shah kynnoh, ba ki la ïoh ïa ka spah be-aiñ lyngba ki kam bamsap jong ki.
