Shillong, K’Lyngkot 09
Ka Meghalaya Commercial Truck Owners and Drivers Association (MCTODA) ha ka 09 tarik u Kyllalyngkot 2026, ka la pynlong ïa ka jingïalang ba nyngkong ban ïakren halor kiba bun ki mat kiba ïadei bad ka jingeh jong ki trai bad nongñiah trok, ba la pynlong ha Community Hall, Baniun.
Ha kane ka jingïakynduhlang la ïa don lut baroh ki trai bad nongñiah trok na kylleng ki district kiba hap hapoh ka shatri jong ka MCTODA.
Haba kren sha ki lad pathai khubor u Bah Mossklandar Marngar, Chairman ka MCTODA u la ïathuh ba ka seng ka la ïakren ïa kiba bun ki mat halor ki jingeh ba ki ïakynduh kum ki trai bad nongñiah trok.
U la ong, ka mat ba nyngkong eh kaba ki la ïakren kadei halor ka jingeh jong ki nongñiah trok kiba ha Ri-Bhoi District, ha kaba ki ju shah beh man ka miet haba ki sangeh harud surok ha kitei ki thaiñ, namar ba ym shah shuh ban ïeng kali ha rud surok ha ki thaiñ Ri-Bhoi.
“Ki nongñiah trok ki hap leit ban kit jingkit sha Jylla Assam bad ki hap ïabeh bha ïa ka por bad ki hap ban leit tang ha ki por mynmiet bad ka shem jingeh lada ym shah ban ïeng harud surok bad ki hap ban ïabeh ruh ïa ka por” u la ong.
U Bah Mossklandar u la kubur ruh da kaba ong “Hooid ka wanrah shibun ka jingeh lada ki trok ki ïeng harud surok, tangba kiba ñiah kali bapli ki shem shitom bha ban leh da kumwei pat namar lada rung sha Assam ruh kim shah bad lada ïeng sha Meghalaya ruh kim shah, kumta kane ka wanrah shibun ka jingeh”.
Ha ka jingïakren, u Bah Mossklandar u la ïathuh ba ka jingeh sha Meghalaya ka long ba kim don ïa ka ‘By-Lane’ kaba ki dei ban shna ka jaka ïeng kali la ka jong. “Ki nongñiah trok ki la ïa sohsat bha haba ki pynsngew sha ngi ki nongïalam” u la bynrap.
Halor kane ka bynta u la ong ba ka seng kan sa leit ban ïakynduh bad ban dawa na ka Sorkar Jylla ba kan ai ka jaka kaba biang ïa ki, ba ki trok kin ïoh ïeng ha ki jaka ba dei ban ïeng, khnang ba ki trai bad nongñiah trok kin nym ïakynduh jingeh.
Ka seng ka la ïakren ruh halor ka jingdon ki para dkhot kiba leh ‘dalal’ ban pynïaid ïa ki kali kiba nabar tang ban ïoh jingmyntoi ïalade.
“Katkum ka jingïathuh ki para dkhot, ki don ki dkhot na ka seng ba ha ka jaka ban ai bylla lang para dkhot hynrei ki leh pat kum ki ‘dalal’ ban ïarap ïa ki kali ba nabar tang ban ïoh myntoi shimet.”
Kumta u Bah Mossklandar u la kyntu ïa baroh ki dkhot ba kin sngewbha ban sangeh noh ïa kum kane ka jait kam. “Lada ki paidbah bad ki nongkhaïi ki ïatyngkhuh halor kane ka kam kin sngewbha ban pyntip sha ki nongïalam ka seng” u la bynrap.
