Washington, K’lyngkot:
Ka tnat Embassy jong ka US hapoh India, ha ka Sngi Balang ka la maham tyngeh ia ki khynnah pule ba ka jingpynkheiñ ia kino- kino ki aiñ bad jingpyrkhing jong ka US, kin hap ban mad ia ka jingpynshitom kiba eh haba iadei bad ka ‘Visa’ naka bynta ki khynnah pule.
Katei ka tnat ka la pynbna hapoh ka rynsan ‘X’ ba kito kiba la ïaid lait ia ki kyndon jong ka US ha kane ka por, ki lah ban duh noh syndon ia ka ‘Visa’ wat lada ki donkam biang hadien- habud. Kumta la ong ba lada ki paidbah kim pynsngap ia kane ka jingmaham, lada ki ialeh pyrshah ia ka aiñ ba la buh, kin shah pynduh noh ia ki ‘Visa’ jongki bad kin shah pynpoi biang noh sha ki ri ba ki dei trai ban shong-sah bad ki lah ruh ban duh noh shi syndon ia ka lad ba kin leit ban rung biang sha US ha ki por ki ban wan. Namar la ong ba ka ‘Visa’ ka long tang ka jingailad jong ka US ia ki, ba kin rung bad pyndep ia ki kam ba ki thmu, ym ka hok ba kin leh ha la ka jong ka mon. Ha ka 19 tarik u Jylliew, katei ka tnat ka la thoh, “Ka visa jong ka US ka dei ka kabu, ym ka hok. Ka jingpeit bniah ia ka visa jong ka US kam shym kut noh tang hadien ba la ai ia ka Visa, hynrei ngi lah ban weng noh ia ka visa jong phi lada phi pynkheiñ ia ka aiñ.” Ha ka 23 tarik u Jylliew, ka Embassy jong ka US ka la bthah ia kito kiba aplai ia ka visa F, M, lane ka J, ki bym dei ki nongwan buhai shnong ba kin pynkylla ia ka jinglong kyrpang ‘Private’ jong ki Social Media Account jongki sha ka rukom paidbah “Public” na ka bynta ban jurip, kaba ka la ong ba ka long kaba donkam ban pynshisha ia ka jinglong jong ki bad ka jinglah ban pdiang ia ki sha US.
