Shillong, K’Lyngkot 09
U Myntri Sorkar u ba long ruh u MLA ka UDP na Amlarem Constituency u la kubur ba ka jingdon ka lynti rel ka lah ban kyntiew ïa ka ïoh ka kot jong ki paidbah, hynrei ka jingeh ka long ba ka jaidbynriew Khasi-Jaiñtia ka dei ka jaidbynriew ritpaid bad ka don ka jingsheptieng ba da ka jingwan ka lynti rel ha ka Jylla ka jaidbynriew kan shah tyllep ha kiwei pat ki jaidbynriew hehpaid jong ka ri India.
Haba kren sha ki nongthoh khubor ha ka sngi Thohdieng, u Bah Lahkmen u la pynpaw ba ka jingpynpoi lynti rel bad kad liengsuiñ ha ki nongbah jong ki Jylla ka dei ka thong jong ka National Democratic Alliance (NDA).
Shuh-shuh u la ong ba kine ki jingthmu ban pynpoi lynti rel lane kad liengsuiñ ha man la ki nongbah jong ki Jylla ha ri India ka dei ka mat treikam (policy) jong ka NDA bad kane kam dei shuh kaba thymmai hynrei kaba la don mynta la kumba 20 haduh 25 snem, hynrei ha Meghalaya kane ka ïapher na kiwei pat ki Jylla jong ka ri namar ka jingtieng na ka jingshah tyllep ha ki briew kiba nabar.
“Watla kane ka dei ka mat treikam ka Sorkar NDA, kaba long ruh shi bynta jong ka roi ka par bad ban pynjan ïa u paidbah bad kiwei ki Jylla, ki paidbah ka Jylla ki pyrshah ïa ka jingwan ka lynti rel ha ka Jylla” u la ong.
U Bah Lahkmen u la ong, kano-kano ka rai ba la shim ka dei ban long na ka bynta ka jingmyntoi jong u paidbah ba bun ba lang.
U la ai jingïaroh ïa ka jingpyrshang ki Dorbar Shnong ban pyrkhing ïa ka jingwan rung ki briew ba nabar, u la ong “Ngi don ïa ka aiñ shnong kaba khlaiñ ban tehlakam ïa ka jingrung ki briew ba nabar bad ba ki briew ba wan nabar kin hap ban bud ïa ki kyndon jong ki Dorbar Shnong” la ong u Bah Lahkmen.
