Shillong, K’Lyngkot 09
Hadien shi sngi ba ki nongtrei Accredited Social Health Activist (ASHA) ka Jylla ki la sdang ïa ka jingïakhih jong ki da kaba sangeh treikam, namar ka jingbym ïoh ïa ka jingsiew jong ki la kumba 6 bnai tam, u Mission Director ka NHM u la khot ïakren ban pynshai ïa ka jingbym ïoh ki ASHA ïa ka jingsiew jong ki.
Haba ïakren hadien ba wai ka jingïalang bad ka Kong Mira June Marsing, President Meghalaya Asha Worker Union ka la ïathuh ba ki la ïoh ka jingpynshai, ba ym dei ba ka tnad ka khlem siew ïa ka bainong jong ki, hynrei ka daw ka long namar ka jingwanrah ïa ka rukom siew kaba thymmai bad ba don ka jingthut ha ki kor ki bor.
Ka Kong Mira ka la ong ba na ka liang ka Dr. N.E Kharsahnoh, Joint Mission Director NHM kaba la khlieh ïa ka jingïalang ka la kyrpad ïa ki nongtrei ASHA ba kin sangeh noh ïa ka jingïakhih jong ki, hynrei na ka liang ki nongïalam jong ka MAWU ki la kyntait ban pynkut ïa ka jingïakhih.
Shuh-shuh ka la ong ba na ka liang ki nongtrei ASHA kim pat sangeh ïa ka jingïakhih hynrei ki la aipor ba ka NHM ka dei ban pynbeit ïa ki jingthut jong ki kor ki bor haba ïadei ka jingsiew jong ki bad ka NHM ka la kular ban pynbeit ïa ki jingthut hapoh ka 24 tarik u Kyllalyngkot 2026.
Ka Kong Sony Kharjana kaba long ka nongaibuit ka MAWU haba bynrap ka la ong, ha ki por ba pyndonkam ïa ka ASHA App ka jingsiew jong ki ka ïaid beit ïaid ryntih bad kaba pynsuk shibun ka rukom ïoh jingsiew jong ki da kaba pynpaw ba kam ju thut kumba ka long mynta.
Shuh-shuh ka Kong Sony ka la ban jur ba ka jingwan jong ka rukom siew ba thymmai hadien jong ka ‘financial year’ ka la pynthut shibun haba ïadei ka jingïoh jong ki nongtrei ASHA bad kaba la pynsngewthait ïa ki ban trei namar ba kim ïoh pdiang ïa kaei kaba ki la dep ban trei shitom.
Ka Kong Sony ka la ïathuh ba katkum ka jingïoh jingpynshai jong ki, ka NHM ka la dep ban pyllait T.23 klur ka pisa kaba dei ka bainong trei jong ki ASHA, hynrei ka jingeh pat ka long ba ha ki ‘account’ jong ki ASHA pat ka pisa ka khlem poi.
