Shillong, K’Lyngkot 09
Ka Khasi Students’ Union (KSU) Bangalore Unit ka la ïoh ban shimti ban sumar ïa u Bah Chaltbha Muksor uba na East Jaiñtia Hills District uba la shah pynbna ba la jah rngai naduh ka 2 tarik u Kyllalyngkot 2026 na ka shnong ba u sah haba u leit sha Bengaluru na ka bynta ka kam bylla.
Katkum ka kyrwoh ba la phah da ka KSU Bangalore Unit ba ka jingïoh jingtip khatduh ïa u ka dei ha Jolarpettai Junction Railway Station, Tamil Nadu ha ka 5 tarik u Kyllalyngkot 2025 ha ka por 6: 00 baje mynstep bad hadien katei kim shym la ïoh shuh ban phone sha u namar ba ka phone ka la switch off.
Hadien ka jingbuddien ïa u Bah Chaltbha la lap noh na Government Medical College and Hospital, Krishnagiri, Tamil Nadu bad mynta u don ha ka jingshngaiñ bad hapoh ka jingsumar bad jingkhmih jong ka Khasi Students’ Union Bengaluru Unit.
Mar ïa ïoh jingtip na ka KSU West Jaiñtia Hills Unit bad ki bahaïing hasem, ka KSU Bengaluru Unit ka la sdang ban pynphriang ïa ki poster bad ki jingpynbna paidbah lyngba ki rynsan social media ha kylleng ka Bengaluru bad Tamil Nadu.
Hadien kata, ki pulit ka Krishnagiri Police Station ki la ïakynduh ïa u Bah Donboklang Nongphud, u President ka KSU Bengaluru Unit bad ki la pyntip ba ïa u Bah Chaltbha Muksor la lap ba u la mynsaw bad u la shah sumar ha Government Medical College and Hospital, Krishnagiri, ha ka 08 Kyllalyngkot 2026 ha ka por kumba 3:00 janmiet.
Kumta ka KSU Bengaluru Unit ka la pynbeit ïa ka kit ka bah bad ki la ïaid shakhmat sha Krishnagiri, ha kaba la mihkhmat da u President u Bah Donboklang Nongphud, u Advisor u Bah Meban Plielad Shadap, u General Secretary u Younidame Suchiang, bad u Assistant General Secretary u Bah Pyndap Umsong. Hadien ba la bishar bniah, la pynthikna ba u Bah Chaltbha u la mynsaw ha ka kjat.
Ka longïing jong u Bah Chaltbha Muksor bad ka KSU Bengaluru Unit ki pynpaw ïa ka jingsngewnguh kaba khraw ïa u SP bad u SI ka Krishnagiri Police Station kiba la leh kloi, ka jingïatreilang kaba tbit, bad ka jingïarap jong ki.
Ka seng ka ai khublei ruh ïa ki bor pynïaid jong ka Hospital bad ïa baroh ki riew shimet kiba la noh synñiang ha ka jingjop ban wad bad ïoh biang ïa u Bah Chaltbha Muksor.
Haba ïadei bad kane na ka liang ka ïing ka sem u Bah Chaltbha Muksor ki la kyrpad ïa ki paidbah da ka jingburom ban sangeh noh ïa ka jingpynphriang ïa ka jingpynbna ba la jah rngai kaba la dep bad ban ïasam ïa khubor ka jingpynbna ba thikna ba la lap noh ïa u Bah Chaltbha Muksor.
