Tura, K’Lyngkot 09
U Myntri Rangbah ka Jylla, u Conrad K. Sangma, ha ka Sngi Thohdieng u la ïashim bynta ha ka jingïalang ban sam ïa ki shithi thungkam ba la pynlong da ka tnad Pulit ka Jylla ha 2nd MLP Battalion, Goeragre.
Haba ai jingkren ha ka jingïalang, u Myntri Rangbah ka Jylla, u la ai khublei ïa ki 76 ngut ki Sub-Inspector (SI) kiba dang rung kam thymmai bad ong ba kane ka sngi ka long kum u mawjam ba kongsan ha ka jingim bad ka kam ka jam jong ki.
U la kdew ba palat 21,000 ngut ki kyrtong ki la aplai na ka bynta ki kam, kaba pynpaw ïa ka jingïakhun kaba jur haba phai sha ka jingthung kam.
Haba ban jur halor ka jingshaniah ki paidbah ïa ki pulit, u Myntri Rangbah u la kyntu ïa ki pulit thymmai ban im katkum ki jingkhmih lynti jong ka Sorkar, ki bahaïing-hasem, bad ki paidbah ka Jylla.
“Na palat 21,000 ngut ki nongaplai, U Blei u la jied ïa 76 ngut na phi ban shakri ïa ka Meghalaya,” u la ong.
Haba pynpaw ïa ka bynta jong ki SI, u la ong sha ki ba ki long kum ki khmat bad ki shkor jong ka tnad pulit bad ka Sorkar, kiba shakri kum ka jingpynïasoh kaba kongsan hapdeng ki paidbah bad ki nongshim rai.
Da kaba kyntu ba kim dei ban kheiñ sting ïa ka bynta jong ki, u la ban jur ïa ka jingkitkhlieh jong ki ban pyntikna ïa ka jingtreikam pulit kaba tikna, kaba treikam bha, bad kaba pynshong nongrim ha ki paidbah.
Ha kajuh ka por, u la pynkynmaw ïa kine ki pulit thymmai ba kin long kiba don ka jingsngewthuh bad ban long jai-jai haba pyndonkam ïa ka bor bad maham ban ym ailad ïa ka bor ne ka kyrdan ban leh trai khlieh halor jong ki.
U la kyntu ruh ïa ki ban shimkhia ïa ka jingshah hikai, da kaba batai ïa ka kum ka nongrim jong ka jingïaid lynti jong ki ha ka kam ka jam.
Na ka liang u Myntri Rangbah u la ïaroh ruh ïa ka Director General of Police (DGP) bad ïa ka ‘Recruitment Board’ kiba la pynïaid ïa ka rukom thungkam ha ka rukom kaba hok, kaba shai, bad kaba paka wat hapdeng katto-katne ki jingeh.
“Kane kam dei tang shaphang ka kam, ka dei ban shakri ïa ki paidbah ka Meghalaya, ïa ka ri bad ka jaidbynriew”, u la ong.
Hashuwa, ka DGP ka Jylla, Kong Idashisha Nongrang, IPS, haba pynpaw ïa ka jingkhlaiñ ki pulit ka Meghalaya, ka la ong ba ka jingrung kam jong ki 76 ngut ki SI ka la kyntiew ïa ka bor kaba la don lypa – kaba palat 17,000 ngut.
“Phi pynïasoh ym tang bad ka kynhun, phi pynïasoh bad ka longïing,” ka la ong.
Ka la ïathuh shuh-shuh ba kine ki pulit thymmai shen kin hap leit mih sha North Eastern Police Academy (NEPA), ha kaba ka jingshah hikai kan sdang naduh ka 30 tarik u Kyllalyngkot.
Kane ka kynhun ka kynthup ïa 49 ngut ki Sub-Inspector shynrang bad 27 ngut ki kynthei. Shi bynta na ka lai jong kine ki ophisar kin shakri ha East Khasi Hills, katba kiba sah yn phah ïa ki ha kylleng ki 12 tylli kiwei pat ki Unit bad distrik jong ka Jylla.
Ha kane ka sngi, la ïoh ruh ïa ka jingkren na u Chief Secretary ka Jylla, u Dr. Shakil P. Ahammed, IAS.
