Mawkyrwat, K’Lyngkot 11
Ka Civil Hospital Mawkyr-wat kaba dei ka jaka sumar kaba dang rit rta ban ïanujor bad kiwei ki civil hospital hapoh ka jylla ha ka kam ai jingshakri ban sumar ïa ki briew kiba pang ba shitom ha kaba la don ruh ka jingshah kynthoh halor ka jingbym pat biang ki jingdonkam baroh hynrei da ka jingtrei shitom bad jingïatreilang jong baroh kane ka jaka sumar mynta ka kynti kan sdang ban pyndonkam ban sumar ïa ki briew lyngba ka juk ba mynta khamtam eh ban sumar ïa ar tylli ki jait jingpang kiba don ha ka met ki briew ban weng ïa u khñiang Appendix bad maw ksang da kaba leh da ka Laparoscopic Surgery ne kaba shu drill.
Haba kren bad ka Kong Aitibanylla Syiemlieh na ka shnong Rangthong kaba la shah sumar hapoh ka Civil Hospital Mawkyrwat na kine ki jingshitom ka la pynpaw ka jingsngewnguh nyngkong eh ïa U Blei Trai Kynrad Uba la ri la sumar bad ai ruh ka jingkoit jingkhiah ha ka met jong ka lyngba ka jingsumar jong ki doctor.
Ym tang kata, ka la pynpaw ka jingai khublei ïa ki doktor, ki nurse bad baroh kiba trei hapoh kane ka jaka sumar kiba la pynbit pynbiang ïa ki jingdonkam ha kaba ka jingsumar ka la long kaba jop.
U Dr. D Suting, General Surgery ka Civil Hospital Mawkyrwat haba kren ha ki lad pathai khubor u la ong ba ïa kane ka jingpyntreikam ban sumar briew da ka juk ba thymmai u la ong ba la dep ban sdang ha kane ka taïew jong ka 7 tarik u Kyllalyngkot, 2026.
“Watla hapdeng ki jingïaid lynti kiba eh ha kine ki snem bad ki bnai ba la dep, hynrei da ka jinglong ba ïai shah bad trei hok ïa ki kam bad lyngba ka jingwad ki lad ki lynti, kum ka Civil Hospital Mawkyrwat baroh kawei ka la sdang ban pyntreikam ban puid briew da kaba shu sam thliew ne ka Laparoscopic Surgery”, ong u Dr. Suting.
Kumta u la ong ba da kane ka lad ka lah ban ïarap shibun ïa ki nongpang ban pynduna ïa ka jingshim por ban ïoh jingkoit namar da kaba shu drill bad ot ïa ka doh ban sei ïa ki jingpang kum u Appendix bad u mawksang ka don ka jingïapher katkum ka jinglap jong ki.
Namarkata, u la buh ka jingkyrpad ïa kito ki briew kiba don ïa kum kine ki jingpang ba kin mih shakhmat ban wan phah sumar bad kim dei ban tieng namar ki jingsumar lyngba ki tiar ki tar ki la biang lypa.
