Nongstoiñ, K’Lyngkot 11
Ha ka sngi Saitjaiñ jong ka taïew ka Nongstoiñ Block Congress Committee (NBCC) kala ïasnoh kti lang bad ka prokram jong ka Meghalaya Pradesh Congress Committee (MPCC) kata ban ïeng pyrshah halor ka jingpynkylla kyrteng jong ka Sorkar NDA ba la lamkhmat da ka BJP ïa ka skhim MGNREGA 2005 sha ka VB G RAM G 2025.
Kane ka jingïasnohkti lang jong ka NBCC kala long lyngba ka jingïalang kaba la long ha ka 10 tarik u Kyllalyngkot hapoh Congress Bhavan ha Nongstoiñ ha ka jingïadonlang u Bah Kynpham V Kharlyngdoh, Chairman ka Legal Cell jong ka MPCC bad District President SWKHD Congress Committee, u Bah Eric C Kharsyntiew President Nongstoiñ Block Congress Committee, Bah CK Bani President Mawshynrut BCC, ki riew rangbah bad kiwei kiwei.
U Bah Kynpham V Kharlyngdoh haba kren sha ki lad pathai khubor hadien ba la wai ka jingïalang u la ong, kumba 20 snem ka skhim MGNREGA kala ïaid hynrei ka BJP mynta ka pynkylla noh ïa ka kyrteng jong katei ka skhim ïa kaba ym tip kaei ka jingthmu jong ka BJP sha lyndet.
“Ka Congress ka sngewkhia bha ïa kane ka jingpynkylla kyrteng kaba long kum ka jingthmu ban pynïap ïa ka kyrteng jong u Mahatma Gandhi bad kane ka Act kaba mynta kam dei shuh ka ‘demand driven’ hynrei kala dei ka ‘supply driven’ kaba mut kam dei shuh ba ki shnong ki thaw kin phah jingtyrwa sha ka Sorkar hynrei mynta ka Sorkar ka ban notify ba kin ai ne em ïa ka skhim ha kata ka Jylla ka District ne ka shnong bad kam dei shuh ka Guarantee watla ki pyrshang ban pynkiew na ka 100 sha ka 125 sngi,” ong u Bah Kynpham.
Shuh shuh u la ong ruh ba kane ka Act kaba thymmai kan sa pynduh mynsiem ruh, ha kaba kiba bun ki Jylla kiba duk kum ka Meghalaya namar kumba ka paw mynta ka mang ka long 90 na ka Sorkar Kmie bad 10 na ka Sorkar Jylla, kaba lah ban ban khia ïa ki Jylla lada ka jingmang pisa ka tam bad ka neh ruh ban pyntreikam ïa kane ka skhim namar ka jingpynkylla ha kiba bun kum ki ‘biometrics mobile attendance app’ bad kumta ter ter.
U la pynpaw ruh da kaba ong, “Ngi sngewphylla ruh ba ym don wat tang kawei ka seng hapoh ka jylla ki ban kren eiei halor kane hynrei ngi na ka liang ka Congress ngin ïakhun ïa kane bad ngin sa leit sha u paidbah ha ki shnong ki thaw ban pynsngewthuh halor ka jingïapher jong ka MGNREGA pyrshah ïa ka VB G RAM G”.
