Jowai, K’Lyngkot 11
Ka West Jaiñtia Hills District Congress Committee (WJHDCC) ka ïeng pyrshah ïa ka rai jong ka Sorkar Pdeng ba ïalam da ka Bharatiya Janata Party (BJP) ban pynkylla kyrteng ïa ka Mahatma Gandhi National Rural Employment Guarantee Act (MGNREGA) sha ka Viksit Bharat Guarantee for Rozgar and Ajeevika Mission (Gramin) (VB G RAM G) Act, 2025.
Lah ban kdew ba ka Sorkar Pdeng kala wanrah da ka VB-G RAM G ban bujli ïa ka Mahatma Gandhi National Rural Employment Guarantee Act 2005 (MGNREGA) kaba dei ka skhim bylla 100 sngi.
Haba kren sha ki lad pathai khubor ha ka 10 tarik Kyllalyngkot, u MDC ka Congress, Ma Madonbai Rymbai u la ong, ka rai bujli ïa ka MGNREGA sha ka VB-G RAM G kan ktah ïa ki nongshong shnong ka ri India kiba don ha ki thaiñ nongkyndong bad ka thmu ruh ban knieh noh ïa ka hok ïoh kam bylla sngi jong ki paidbah khamtam ki longkmie ha ki thaiñ nongkyndong.
“Mynshwa lyngba ka skhim MGNREGA ki paidbah ki lah ban dawa kam bad ka Sorkar hapoh 15 sngi ka dei ban ai kam bad lada kam lah ki dei ban siew ka bainong hynrei mynta lyngba ka VB-G RAM G ka Sorkar Jylla ka hap ai kam katkum ka jingmang tyngka ka Sorkar Pdeng,” u la ong.
Shuh shuh u la ong, ka MGNREGA ka ai jingïarap ïa ki million ki longïing nongkyndong ha kylleng ka ri kynthup ïa ki hajar ngut ha Meghalaya. Ka MGNREGA ka ïarap ha ka por ba duh ki jingthung, ka jingshlei um, nalor kiwei bad ka ailad ïa ki briew ban im ha la ki jong ki shnong.
Ki kynthei ki la long pdeng jong kane ka aiñ, ha kaba haduh 60 percent na ki nongtrei MGNREGA ha kylleng ka ri ki dei ki kynthei, kaba pynlong ïa ka kum kawei na ki lad ai kam ïa ki kynthei nongkyndong bad da kaba bujli ïa ka MGNREGA, ka Sorkar BJP ka thombor ïa ka jinglong laitluid jong ki kynthei ha ka ïoh ka kot, ka jingshngaiñ ha ïing ha sem, bad ha ka imlang sahlang, u la ong.
Kumta ka Meghalaya Pradesh Congress Committee ka ïeng skhem bad ki nongbylla nongkyndong, ki job card holder, ki nongbylla kynthei, ki Adivasi, ki Dalit, bad ki longïing kiba shah iehnoh beiñ, u la ong.
Nalor u Ma Madonbai Rymbai ha kane ka sngi la donlang ruh u MDC ka Congress na Saphai-Sahsniang Ma Rikut N Parien, ka President Meghalaya Pradesh Mahila Congress ka Kong Joplin Scott Shylla nalor ki nongkitkam ka Congress hapoh ka District.
