Shillong, K’Lyngkot 11
Ka Meghalaya Pradesh Congress Committee ka la pynpaw ba lada ki nongkyndong ki sah ha ka jingduk kan pynlong biang ïa ki ban hap leit pan jingïarap na ki riew saiñ pyrthei.
Haba ïakren bad ki nongthoh khubor, u Bah Banphira Basaïawmoit, Chief Organiser, SEVA Dal, u la ong ba ka Mahatma Gandhi National Rural Employment Guarantee Act, (MGNREGA) ka dei kaba la aikam ai jam ïa ki paidbah nongshong shnong khamtam kiba na nongkyndong ban lait leit wad kam shabar shnong.
U la ong ka jingpynkylla ka Sorkar India kaba la ïalam da ka BJP na ka kyrteng MGNREGA ka la buh jingma ïa ki nongkyndong namar mynta ïa ka bai bylla la siew 90 percent na ka Sorkar India bad 10 percent na ka Sorkar Jylla katba ha ka por jong ka Congress ka bai bylla la siew beit da ka Sorkar India haduh 100 percent.
U la ong wat ïa ka tulop jong ki nonghikai ka Sorkar Jylla kam lah ban siew thikna, kumno ka Sorkar Jylla kan siew ïa ka 10 percent ïa ka bai bylla jong kiba trei shispah sngi kane kan sa wanrah shuh-shuh ka jingeh ïa ki nongkyndong.
U la ong ba wat ïa ka bai tiar ka Sorkar kam lah ban siew bad kane ka la buh jingeh ïa ki briew kiba ju kyrshan ïa ki tiar haba trei ïa ka skhim MGNREGA.
Shuh shuh u la ong, ka Congress ka wanrah ïa ka skhim MGNREGA ka long ban pyllait ïa ki paidbah ha nongkyndong ban nym shah ïalam bakla ha ki riew saiñ pyrthei namar lada ki biang ka bylla ka sngi ki lah ban shim rai hi ban jied ïa u nongmihkhmat hynrei lada ki duna ka bylla ka sngi ka pynlong ïa kiba ïakhun ilekshon ban shim kabu tang ban ïoh thied ïa ka vote.
