Shillong, K’Lyngkot 11
U Myntri ka tnad PHE uba dei ruh u MLA ka NPP na Williamnagar, u Marcuise N. Marak u la pynrem jur ïa ka jingshah thombor jong ki dkhot ka ACHIK ha Rajabala, West Garo Hills District, da kaba ong ba ka dei ka jingthombor kaba khawpud bad “ka jingthombor ïa ka shongsuk shongsaiñ, ka synshar paidbah, bad ka jingsynshar aiñ”.
Ha ka kyrwoh ha ka Sngi Saitjaiñ, u Marak u la pynpaw ïa ka jingsn-gewsih jur halor katei ka jingjia bad ong, “Nga pynrem jur ïa ka jingthombor bad ka jingleh khawpud da ki runar ki bym lah ban ithuh ïa ki dkhot jong ka ACHIK ha Rajabala, West Garo Hills District. Kiba kum kine ki jait kam kim don jaka ha ka imlang-sahlang jong ngi bad ki thombor beit-beit ïa ka suk ka saiñ, ka synshar paidbah bad ka jingsynshar aiñ.”
U Marak u la kyntu ïa ki bor ba dei khmih ban shimkhia mardor ha ka ban pynithuh bad ban pynngat ïa ki nongleh kam sniew ha ka aiñ.
“Nga la ïakren hi bad ki bor distrik lem bad ki bor ba dei khmih bad nga la kyntu ïa ki ban shimkhia mardor bad rai tyngeh ban lap ïa ki nongleh kam sniew bad ban pyntikna ba kin shah pynngat kloi ha ka aiñ,” u la ong.
Na ka liang u Myntri u la phah ruh ïa ka jingsngewlem sha ki bahaïing hasem jong u dkhot ka ACHIK, u Dilseng M. Sangma, uba la duh noh la ka jong ka jingim ha katei ka jingjia.
“Ka jingsngewlem jong nga ka leit sha ki bahaïing hasem jong u Dilseng M. Sangma uba la khlad noh namar ki jingmynsaw jong u. Ka jingkhlad bym pat dei por jong u ka long ka jingduh kaba khraw, bad nga ïeng lang ha syndah ryngkat ka jingïatylli bad ki bahaïing hasem jong u, ki paralok, bad ka ACHIK ha kane ka khyllipmat jong ka jingsngewsih kaba jur,” u la ong.
U Marak u la kyrpad ïa ki paidbah ban long kiba jai-jai bad ban pynneh ïa ka shong suk shong shngaiñ, da kaba pyntikna ba ka hok kan ïeng rasong.
“Nga kyrpad ïa ki paidbah ba kin long kiba jai-jai bad ban pynneh ïa ka shong suk shong shngaiñ; bad pyntikna ba yn ym map ïa uno-uno uba donkti ha kane ka kam runar ba shyrkhei. Ka hok ka dei ban ïeng rasong, bad ka jingshngaiñ jong ki nongshong shnong jong ngi ka ïai long kaba kongsan tam,” u la ong.
