Vijayawada, K’lyngkot:
Haba kynthoh ïa ka sorkar NDA ba la ïalam da ka TDP namar ki polisi bym ïahap jong ka, u heh ka YSRCP bad u Myntri Rangbah barim u YS Jagan Mohan Reddy u la ong ba ka jingtei ïa ka nongbah jong ka jylla ka Amaravati ha ka wah ka long ka bym shngaiñ, ka bym long katkum ka jingstad saïan, bad ka long pyrshah ïa ki kyndon ba la buh.
Haba kren sha ki lad pathai khubor , u Jagan u la ong, “Ka thaiñ Amaravati kam long kaba biang, ha ka liang ka jaka bad ka jingtei ban treikam kum ka nongbah.”
Da kaba kdew ba wat ki jingtei shimet shimet ha ka jingïalang kim shah ha ka thaiñ wah, u la ong ba ka jingthmu ïa ka nongbah baroh kawei ha kum kane ka jaka ka dei ka rai kaba ma, bad kaba la pyrkhat bakla, kaba lah ban buh jingma ïa ka jingshngaiñ jong ki paidbah.
“Ka Amaravati, kaba jngai kumba 40 km na Vijayawada bad Guntur, ka duna ïa ki jingdonkam ba kongsan kum ki surok, ka bording bad ka umbam umdih. Kumno yn lah ban tei ïa ka nongbah jong ka jylla ha Amaravati, ha kaba wat ki jingdonkam kiba rit eh ruh kim don satia?” u Myntri Rangbah barim u la kylli, da kaba bynrap ba ka jaka jong ka nongbah jong ka jylla dei ban pynbeit da ka jingsuk paidbah bad ka jingsynshar, bad ka jingshngaiñ.
Haba phai sha ka Rayalaseema Lift Irrigation Scheme (RLIS), u Jagan u la thombor tyngeh ïa u Myntri Rangbah ka jylla N Chandrababu Naidu, da kaba kynnoh ba u la shet kylla ïa ki paidbah ka Rayalaseema da kaba thmu ban khanglad ïa kane ka projek lyngba ki jingpyntip bakla bad ki kam saiñ hima sima.
U la kynnoh ba u Naidu, u pyrshah ïa ka RLIS, katba u ailad ïa ka Telangana, kaba marjan, ba kan sei ïa ka um, kaba kham bun ban ïa ka bhah kaba dei hok jongka, na ka projek Srisailam.
“Katba ka jylla ba marjan ka la sei haduh 8 TMC ka um man ka sngi lyngba ki jingtrei jong ki Lift bad ki kor pynmih bording na ka jingjrong kaba 777 haduh 825 phut, ka Andhra Pradesh ka don ka lad khyndiat ban ïoh ïa ka um namar ba ka jingheh jong ka jaka buh um kan ym kiew sha ka dak kaba donkam. phut, ka la long tang kawei ka lad kaba lah ban pyntreikam na ka bynta ka Rayalaseema,” la batai u Jagan, da kaba kynnoh ba u Naidu u la pynthut ïa ka projek da kaba pynshlur ïa ki dkhot jong ka seng jong u ban ujor mukotduma ha ka National Green Tribunal (NGT).
U Myntri Rangbah barim u la ong ba ka jingkren jong u Myntri ka tnad umbam umdih kaba batai ïa ka RLIS kum ka “jaboh” ka pynpaw ïa ka jingshet kylla ïa ka thaiñ kaba don ka jingkyrduh um, ka jingmut kaba la kyrshan hadien da u Myntri Rangbah ka Telangana ha ka dorbar thawaiñ.
“Dei tang ha ka por jong ka sorkar YSRCP, la ïada bha ïa ki jingmyntoi na ka um jong ka Andhra Pradesh. Ka sorkar jong nga ka la lah ban pyndap ïa ka jingsam um, ka la lah ban pynbiang ïa ka jingduna jong ka Galeru Nagari Sujala Sravanthi (GNSS), pyndep ïa ki lynti krem Owk bad pyndap ïa ka Gandikota, Chitravati bad kiwei pat ki jaka pyllang um ban pynbiang ïa ka Rayalaseema, Nellore bad ki bynta jong ka Prakasam distrik. Ha ka jingïapher, la ai ïa ki kontrak ai um khlem da khot Tender ha ka por ba u Naidu u dang synshar na ka bynta ki jingsiew biang ïa ka jinglut,” u la pynshisha.
Haba kynnoh ba u Naidu u la pyndonkam da ka “Credit Chori” na ka bynta ki projek kum ka kad liengsuiñ ha Bhogapuram, u Jagan u la ong ba dei ka sorkar YSRCP kaba la pyndep ïa baroh ki kam ba nyngkong, bad kaba la ïoh ïa ki jingbit ba donkam.
U Myntri Rangbah barim u la kyntait ruh ïa ki jingkynnoh ba ki karkhana ki la mih noh na ka AP ha ka por ba u long kum ka jingpynbna lamler.
U Jagan u la kynnoh ba u Naidu u la pynkylla ïa ka jingkular jong u ban ym pynkiew ïa ka bai bording, da kaba kynnoh ba la pynkiew ïa ka bai bording da T.20,135 klur, ryngkat bad ka jingpynkiew ïa ka bai pynrung kyrteng, ka bai surok, ka bai kali, bad kiwei kiwei ki khajna.
