Shillong, K’Lyngkot 11
U Nongïalam ka liang pyrshah u Dr. Mukul Sangma u la kynnoh ïa ka Sorkar ka leh khnang ban ym pyntreikam ïa ka MRSSA 2016, da kaba kynthoh ba ka MRSSA kan khanglad ïa ka jingtih bad shalan be-aiñ ïa u dewïong.
U Dr. Mukul u la ong, “ka MRSSA 2016 ka la bthah ban buh ïa ki kor CCTV ha ki surok National Highways bad ruh ha ki State Highways. Mynta to ïathuh ïa nga, lada ki kor CCTV ki la don ha kylleng ki surok National Highways bad State Highway, da kaba suk ki lah ban peit ïa ka jingshalan be-ain ïa u dewïong .”
U la kynnoh ba ka Sorkar ka ailad ïa ka jingtih be-aiñ dewïong, da kaba ong,”Ka kwah ban ailad ïa ka jingtih be-aiñ ïa u dewïong, dei namar kata ka daw ba kam shym la pyntreikam ïa ka MRSSA. Lada phi nud wan ban ïatai-nia bad nga halor kane ka jingkynthoh.”
U Dr. Mukul u la ban jur ïa ki jingmyntoi jong ka jingpyntreikam ïa ka MRSSA, kaba u la ong, “Mar ïa pyntreikam ïa ka MRSSA, kam don ka jingshalan bad tih be-aiñ ïa u dewïong, ka MRSSA kan long kum ki khmat bad ki shkor jong ki bor ka Sorkar”.
U la kynnoh ba ka dei ka jingbym shimkhia bha ka Sorkar bad u la buh jingkylli, “Hato ka dei ka kamram jong ki nongshong shnong ban wanrah ïa ki sakhi man la ka por..? Ka Sorkar pat ka leh aiu…? Hato kam dei ka kamram jong ka Sorkar ban ïada ïa ka hok ki paidbah bad ka Jylla…?”.
U la kdew ruh ïa ka jingbishar jong ka ïingbishar ba ha khlieh duh (Supreme Court) da kaba ong, “Haba ki bor ba dei peit ki tip ba ki don ki kam be-aiñ, hynrei ki khlem shimkhia, kane ka kylla long kum ka jingleh pyrshah kaba hap hapoh ka Prevention of Corruption Act, 1998… Kumta ki la don ïa ka jingmut sniew bad dei na kata ka daw ba ki mih kine ki kynrum kynram baroh.”
