Chicago, K’lyngkot:
Kawei ka kali ‘Tesla’ ka la leit tyngkhuh bakla bad kem ding ha ka nongbah Chicago ha ka Sngi Thohdieng hadien ba u nongñiah jong katei ka kali, u la kem pang kynsan ha ka por ba dang ïaid ka kali. Kane ka la jia ha ka por kumba 5 baje jong katei ka jan miet Sngi Thohdieng ha ka surok Route 59 jong ka thaiñ Naperville.
Katkum ka khubor jong ka NBC5 Chicago, utei u rangbah uba la 37 snem ka rta, u dang ñiah ia ka kali Tesla Model Y jong u snem 2025, hajan ka surok Cantore, ha kaba u la kem pang kynsan ha ka por ba ñiah kali. Ka kali ka la tynrah nyngkong ia kawei pat ka kali shwa ban leit poi bakla noh sharud jong ka surok, ha kaba ka la ioh tynrah ia uwei u dieng bad ka la kem ding hangta.
Uwei u pulit jong ka Naperville uba dang don ha ka kam bad uba la sakhi ia katei ka jingjia, u la leit mareh ban tan ia utei nongñiah napoh ka kali kaba la kem ding jur. Ki nongïarap kyrkieh, kynthup ïa ki pulit bad ki nongpynlip ding, ki la leit poi sha katei ka jaka hadien ba la ïoh jingtip ba ka la don ka jingpluh kali ha katei ka thaiñ.
Ka video ba la saphriang na katei ka jaka, ka pyni ba katei ka kali Tesla kaba la ingkhong lut phloiñ, ha kaba ki bynta ba lyngkhot- lyngkhai jong katei ka kali, ki la sied ba saphriang ha katei ka jaka. La iohi ruh ia ki liengsuin ‘helicopter’ kiba leit her sha katei ka jaka katba ki nongtrei ki dang iarap ban pynlip ia ka ding.
Ki dur na katei ka jaka ki pyni ba ka kali Tesla ka la ingkhong lut, ha kaba ki tnat iarap ba kyrkieh ki la peit bniah bha ia katei ka kali kaba la shah pynjulor. Ha ki katto katne ki dur, la iohi ia ki nongpynlip ding ba ki synreit um ha ki bynta ba dang kem ding jong katei ka kali. Ki nongpynlip ding ki la pyndonkam da ka um kaba bun ban pynlip shwa ia ka ding bad nangta ban pyndeit-thah ia u battery kumba ju leh ia ki kali ilektrik kiba la shah kem ding.
Ka video, kaba la ring da u nongpeitkai na jngai, ka la pyni ia kawei ka kali Tesla kaba lieh kaba la kem ding bad ingkhong noh, ha kaba ka tdem kaba iong bad ba rben kaba mih na katei ka kali, ka la kiew shalor suiñ jong katei ka jaka.
