Vijayawada, K’lyngkot:
U Myntri Rangbah ka jylla Andhra Pradesh u N Chandrababu Naidu u la plie ïa ka Sale of Rural Artisans Society (SARAS) Mela-2026 ha Guntur bad u la leit jngoh ruh ïa ki stall ba la buh da ki kynthei ka kynhun DWCRA, da kaba ïakren bad ki.
U Myntri Rangbah ka jylla u la ïathuh ba 1.13 klur ki longkmie ka DWCRA ha ka jylla ki la lum pisa haduh 26 hajar klur bad thaw ïa ka Corpus fund kaba 5200 klur tyngka.
Ha u snem 2024-25, ki kynhun jong ka DWCRA ki la ïoh ram na ki Bank kaba kot sha ka 46,590 klur tyngka.
U la ai khublei ïa u Myntri ka sorkar pdeng u Pemmasani Chandrasekhar uba la lah ban pynlong ïa kum kane ka jingpyni nam ha ka jylla, kaba ju pynlong ha ka nongbah jong ka ri, ha New Delhi.
U Myntri Rangbah u la ong ba ka SARAS Mela kan ai ïa ka jingpynbna bad ka jingpynïasoh ïa ki ïew ki hat na ka bynta ki jingshna kti tynrai, ki jingshna kti bad ki mar bam trai ri.
U la pynpaw biang ba tang ha u snem 2024-25, ki kynthei ka DWCRA ki la shim ram T.46,590 klur na ki bank bad ban jur ïa ka jingdonkam ban kyntiew ïa ki kynhun DWCRA.
U Naidu u la ong ba ka sorkar synrop ka trei da kaba pynleit jingmut ha ka bha ka miat bad ka roi ka par.
Hapoh ka skhim Talliki Vandanam, la pynrung T.10,090 klur man la u snem sha ki Bank Account jong ki kmie jong ki 67 lak ngut ki khynnah skul. Lyngba ka skhim Stree Shakti, ka sorkar ka la wanrah ïa ka jingleit jingwan da ki bos khlem jingsiew na ka bynta ki kynthei.
Hapoh ka skhim Deepam, la ai lai tylli ki tyndong Gas khlem jingsiew man la u snem.
U la pynskhem biang ba ka sorkar ka ïaid shakhmat da ka thong ban ïoh ïa ka jylla kaba lait na ka jingduk.
Shwa kane, u Myntri Rangbah u la aiti ïa ka Cheque kaba T.1,375 klur kum ka ram sha ki kynhun DWCRA hapoh ka skhim Stree Nidhi bad sanction T.2,171 klur kum ka ram sha ki kynhun trei shimet lyngba ka SERP.
Hadien ba u la leit jurip ïa ki jaka die jaiñ ba la thaiñ da ka kti, u la thied ïa ka sari na ka bynta ka kurim jong u, ka Bhuvaneswari.
