Shillong, K’Lyngkot 11
Ka Bharatiya Janata Party (BJP) ka la dawa da ka jingpynshitom kaba tyngeh ïa ki nongleh kam sniew kiba donkti ha ka jingpynïap ba shyrkhei ïa u dkhot ka ACHIK, u Dilseng M. Sangma bad kyntu ïa u Myntri Rangbah ka Jylla u Conrad K. Sangma ban pyntikna ïa ka jingtohkit kaba bniah halor katei ka jingjia bad ïa ka mat kaba ïar jong ki kam tih par (be-aiñ) hapoh ka Jylla.
“Haba dawa ïa ka jingpynshitom kaba tyngeh ïa ki nongleh kam sniew haba ïadei bad kane ka kam runar, ka State-BJP ka kyrpad ïa u Myntri Rangbah ka Jylla ban pyntikna ba ha kane ka kynti, ki bor ba dei khmih kin kham shimkhia ha ryngkat ki sienjam ba tyngeh bad ym tang ka jingkem ïa ki katto-katne. Baroh ki kam tih par be-aiñ ha ki liang bapher-bapher hap ban tohkit bniah, ban sdang ïa ki lad pynbeit, ban pynsangeh shi syndon ïa ki kam be-aiñ bad dei ban pynngat ïa uwei-pa-uwei uba donkti ha ki kyndon aiñ,” ong u nongaiktien ba rangbah ka BJP, Bah M. Kharkrang ha ka kyrwoh ha ka Sngi U Blei.
U la ong ba ka jingïap jong u Dilseng M. Sangma, uba la shah thombor ha ka kynhun ki briew kiba donkti ha ka kam tih par be-aiñ, ka buh ïa uwei-pa-uwei u nongshong shnong ka Jylla ba la nang la stad ha ka jingkyndit, jingsngewsih bad ka jingbym lah ngeit.
“Ka BJP Meghalaya ka ïasohktilang bad kiwei pat ki para nongshong shnong ha ka jingsngewlem halor ka jingduh noh ïa ka jingim briew, kaba la shah knieh jyndat noh na ngi ha ka por kaba dang kloi palat, ha ka rukom kaba shyrkhei tam. Ka jingïap ha kano-kano ka rukom ka wanrah ïa ka jingsngewsih kthang, ka jingpynïap briew ka pynkhuslai mynsiem ïa uno-uno u briew uba don ka jingsngewthuh. Kaba pynsniew shuh-shuh ïa ka jinglong-jingman bad kaba pynsngewsih arshah ka long ba u samla u dei uba wan na ka jaidbynriew Garo; ka jaidbynriew kaba ka jingnoh synñiang jong ka sha ka Jylla ka long kaba khraw,” u la ong.
Katkum ka jingong u Bah Kharkrang, kane ka jingjia kaba shyrkhei ka wanrah biang ïa ka jingma jong ki kam jingtih be-aiñ ha Meghalaya bad ki jingeh kiba mih na ka, na ka por sha ka por.
Shuh shuh ka Jylla ka la sakhi ïa kum kine ki jingjia ha ki por ba la dep ha kylleng ka thaiñ, la ka long ha Ri-lum Jaiñtia ne Ri-lum Khasi; kane ka jingjia ha Ri-lum Garo ka bynrap shuh sha ka thup ba jrong jong ki kam runar bad ki jingjia ba sngewsih ba ktah ïa u briew kiba mih na ka jingsniew kaba donkam ban rat dyngkhong mardor, u la bynrap.
