Tura, K’Lyngkot 11
Ha kawei ka jingjia, uwei u nongshong shnong ka Tikrikilla Sub-Division, u Hamrash Marak u la ujor ejahar pyrshah ïa arngut ki briew kiba la tip kyrteng kum u Mojmul bad u Motlep – baroh arngut ki dei ki nongshong shnong ka Burirjhar, Hollaidanga kaba hap hapoh ka Tikrikilla PS halor ka jingkynnoh khaïi masi be-aiñ bad ki jingkynnoh leh beiñ ïa ki mrad.
Ïa kane ka ejahar la ujor ha Bogulurbhita Outpost hynnin ka sngi, ka 10 tarik Kyllalyngkot.
“U Mojmul u dei u nongpynkit masi be-aiñ bad u Motlep u dei u trai jong ka jaka ha kaba la buh be-aiñ ïa bun tylli ki masi. Ki masi ba la kdew, la buh ha ka jaka kaba rit khlem ka jaka rieh ba biang, ka sem, ne tnum bad la buh ïa ki khlem jingker nalor ha ka por ba jur bha ka jingkhriat kaba la sdang naduh ka taïew ba la dep. Kane ka kam ka paw shai ba ka long kum ka jingleh beiñ ïa ki mrad bad ka dei ka kam kaba lah ban pynshitom hapoh ka ‘Prevention of Cruelty to Animals Act’, 1960 bad ki kyndon ba ïadei kiba la buh hapoh jong ka,” ong ka ejahar.
Ka tyllong khubor na katei ka thaiñ ka ïathuh ba hadien ba la ujor ïa ka ejahar ha ryngkat ki sabut lyngba ki dur ki dar, hashuwa ba ki pulit kin leh eiei halor katei ka bynta, la weng noh ïa ki masi na katei ka jaka – kaba pyni ïa ka jingïasylla hapdeng ki nongkhaïi tuh bad ki bor ba dei khmih.
Ka ejahar ka la bynrap ba ki nongshah kynnoh, u Mojmul bad u Motlep ki donkti ha kane ka kam be-aiñ la slem bah khlem kano-kano ka jingbit jong ka aiñ.
“Shuh shuh, nga la ïoh ïa ka jingbit katkum aiñ na ka Garo Hills Autonomous District Council (GHADC) ban lum khajna masi. Wat hapdeng kane, u Mojmul u ju pep bad kyntait ban siew ïa kane ka khajna masi ba la buh haduh kine ki sngi, kaba pynkheiñ pat ïa ki kyndon ba treikam,” ong ka ejahar.
U Hamrash u la kynnoh ba ka jinglong-jingman ha kaba la buh ïa ki masi ka long kaba i-sangsot haduh katta-katta bad buh jingma kaba khraw ïa ka koit ka khiah bad ka jingim jong ki.
“Kum kine ki kam ym tangba ki long kiba be-aiñ hynrei ki long ruh kiba pyrshah ïa ka jingmyntoi paidbah bad ki kyndon ka bha ka miat jong ki mrad,” ong u nongujor haba dawa pynngat aiñ pyrshah ïa ki nongshah kynnoh.
