Shillong, K’Lyngkot 11
U Dr Mukul Sangma, uba dei u Nongïalam ka Liang Pyrshah bad ruh u Myntri Rangbah barim ka jylla u la ther bad kynthoh tyngeh ïa ka Sorkar MDA ba lamkhmat da ka National Peoples’ Party (NPP) halor ka jingkynnoh ba jam palat pud ïa ka bor thaw aiñ da kaba tyrwa ïa ka Amendment Bill jong ka Meghalaya Residents Safety and Security Act (MRSSA).
U Dr Mukul u la kop ruh ïa ka Sorkar ba kan thaw ïa ka aiñ thymmai ban ïada ïa ka bha ka miat ki paidbah, lada ki don jingartatien ïa ka jingtreikam jong ka MRSSA, 2016.
Haba kren bad ki lad pathai khubor ha ka sngi Saitjaiñ, u Dr Mukul u la ong, “Ka Amendment ba tyrwa ka Sorkar Jylla kala pulom, hynrei ka Principal Act (MRSSA) kam shym la pulom hynrei ki kwah ban pynkylla kaba ïaid palat ïa u pud thaw aiñ jong ki.” “Ngi hap hapoh ka jingsynshar ka Sorkar Pdeng, ngim lah ban pynkylla ïa kano kano ka sobjek kaba don ha ka thup jong ka Union list. Namar kata, haba ngi thaw aiñ, dei ban sngewthuh bha da ki nongthaw ïa ka Bill kaba hadien lada mynjur da ka ïingdorbar thawaiñ kan kylla long ka Act hadien ka jingai jingmynjur jong u Lat. Shisien ba ngi ïaid palat pud, ïa kane ka bill hi yn hap ban phah sha ka Sorkar India namar phi la jam palat pud, kumta u Lat um lah satia ban ai jingmynjur. Kane ka mut, ka Sorkar MDA ka don ïa kawei pat ka jingthmu ha lyndet ban pynlong ïa ka MRSSA 2016, ba kan ym treikam lane kwah ban buh sha kyndong, kumta namar kane ka MRSSA kala kylla long ka bym lah ban pyntreikam da kane ka amendment ba la tyrwa,” u la ong.
U la kynthoh jur ïa ka jingbym ler thaw aiñ ka Sorkar bad ong, “Nga la kdew ïa ka Sorkar ha ka por ba leh ïa kane ka kam hynrei kim shym la sngap ïa nga, kim shym la sngap ïa u briew ba don bynta ban thoh ïa kane ka aiñ, ki mut ba ki dei ki nongthoh ba kham bit bad peit haei ka kut. Nga synei ïa ka jingbym ler thaw aiñ jong ki”.
Shuh shuh u la kynnoh ïa ka Sorkar ba ka shu lamler sha ki paidbah halor ka facilitation centre da kaba ong “Ka High Court kala ong ba namar ka jingbym don ka kyndon treikam kaba biang, kane ka facilitation centre kam dei ban treikam. Ka dei ka kamram jong no ban pynkhreh bad ai ïa kine ki kyndon treikam? Kumno ki facilitation centre ki dei ban treikam ka dei ka kam kaba hap ban pynïaid katkum ki kyndon treikam. Ka Sorkar ka khlem leh ïa la ka kamram, ka la shukor ïa ki paidbah, ta ka daw ba ym shym la lah ban pyntreikam ïa ka MRSSA bad khatduh la mih ki briew kiba rah ïa ka MRSSA sha ka jingtian bishar ka ïingbishar hynrei ka MRSSA, 2016 kala ïeng rasong hakhmat ka jingbishar aiñ hynrei dei ka amendment kaba ïaid palat ïa u pud thaw aiñ jong ka Sorkar ba ka MHA kala pynphai”.
U Dr Mukul u la kyntait ruh ïa ka jingkynnoh u Symbud Myntri Rangbah ka Jylla Bah Prestone Tynsong ba ong ba ka Sorkar barim ba ïalam da u Mukul Sangma, kala leh ïa kaba bakla eh da kaba shu pynrung ïa ka kyndon Entry-Exit point tang ha ka rules ym ha ka Principal Act haba pynpaw ba dei kane ka jingleh bakla ba ka ïingbishar kala khang ban pynïeng ïa ki Entry-Exit Point.
U la kynnoh ba u Bah Prestone u la thok ïa ki paidbah da kaba ong “Ha kajuh ka por, nga la bitar bha namar u la shukor ïa ki paidbah, kiba la jied ïa u. U la shukor ïa ki paidbah ka Pynursla. Hato ki paidbah ka Pynursla kim don jingsngewkhia halor ka jingrung kyrthep ki mynder ri, ki sngewkhia, hooid”.
