Shillong, K’Lyngkot 12
U Myntri ka tnad pule puthi u Bah Lahkmen Rymbui ha ka sngi Nyngkong u la bthah ïa ki heh ophisar ka tnad ban leit ïakynduh ïa ka Pro-Vice Chancellor jong ka North Eastern Hill University (NEHU)’s Tura campus ban thaw lad haba ïadei ki jingeh ha ka ban pynïaid ïa ka skulbah namar ka daw ka jingpep trei u Vice-Chancellor Prof. P Shukla mynta la 422 sngi.
Kane ka jingbthah jong u Bah Lahkmen ka long hadien ka jingïakynduh jong u ïa ki seng ba kynthup ïa ka North-Eastern Hill University Teachers’ Association (NEHUTA), NEHU Non-Teaching Staff Association, NEHU Student’s Union (NEHU-SU), bad ka Khasi Student’s Union (KSU), kiba la kyntu ïa u ban tuklar haba ïadei kane ka jingeh.
Ki seng bapher-bapher ki la kyrpad ba ka Pro-VC jong ka skulbah Tura kan shimti ïa ka kam kum ka Acting VC lane ba kan risaiñ noh, khnang ban lah ban ailad da kiwei pat ki ‘professor’ kiba la kham heh kyrdan ban shimti noh ïa kane ka kam, khnang ban lah weng ïa kine ki jingeh bad ban wanrah biang ïa ka jingshong shngaiñ hapoh ka skulbah.
“Nga la bthah ïa ki ophisar jong nga ruh ban pynbeit noh ïa ka jingïalang bad ka Pro VC jong ka Tura ban peit bniah kaei ka jingshem jong ka, ka jingmut ba hakhmat jong ka Sorkar ka long ba ki samla pule ka NEHU kim dei ban shah ktah, namar lada don kano-kano ka jingshah ktah ïa ki, kan sa ktah ïa ka NEHU baroh kawei bad kumjuh ruh ïa ka Jylla baroh kawei namar kiba bun ki College ha ka Jylla ki dei kiba la pynïasoh bad ka skulbah NEHU bad wat haduh ki Scholarship jong ki samla pule ruh kan shah ktah,” la ïathuh u Bah Lahkmen ha ki nongthoh khubor.
Haba pynpaw ïa ka jingsngewkhia halor ka jingeh ha ka rukom pynïaid ha NEHU, u Myntri u la ong, “Ka jingpynïaid ha NEHU ka la long kaba ïap shiliang… ka long kaba eh shibun ban pynbna ïa ki risol, ban siew ïa ki tulop bad ruh ban bei pisa na ka bynta ki ‘seminar’ bapher-bapher bad khamtam eh na ka bynta ban pynbna ïa ka risol bad ïa kiwei-kiwei de ki prokram ha NEHU.”
U Myntri u la ban jur ba ka jingthmu ba hakhmat duh jong ka Sorkar ka dei ban pynthikna ba ka skulbah ka treikam bha khlem don kano-kano ka jingshah ktah ïa ki samla pule. U la pynpaw ruh ba u la phah jingthoh sha u Union Minister ha ka 15 tarik Nohprah 2025, ban pan ïa ka jingpynbeit kaba skhem halor kine ki jingeh.
U la pynpaw ba un sa pyrshang biang ban ïoh shong jingïalang bad u, khnang ba kata ka jingpynbeit kan long kaba skhem bad ba ka skulbah NEHU kaba dei ruh ka skulbah kaba la paw ha ka ri India kan ïaid beit ha ka rukom treikam jong ka, la ka dei ha ka pule puthi ne ha kiwei-kiwei ki liang.
U Myntri u la ban jur ruh ïa ka jingdonkam kyrkieh ban pynbeit noh ïa kane ka jingeh, da kaba u la kdew ïa ka jingshah ktah ki samla pule bad ki College kiba ïasoh bad ka skulbah.
Shuh-shuh u la bynrap ba ki aiñ ka skulbah NEHU kim aibor ban thung ïa u Acting VC… U Acting VC ba mynta u dei ban ïehnoh shwa ïa ka kyrdan jong u kumba leh u Prof. Umdor, na ka bynta ba ki ‘professor’ ba kham heh kyrdan kin lah ban shimti ïa katei ka kyrdan.
Haba kylli halor ka jinglong jingman jong ka jingtohkit ba la pynlong da ka tnad, u Bah Lahkmen u la ong ba ka kaiphod jong ka jingtohkit ba la ïalam da u Prof. DP Singh ka dang sah dum khlem pynpaw, u la ong ba “Ka tnad ka khlem leh sting bad na kata ka daw ka pynlong ïa ka jingtohkit…. hynrei haduh mynta ruh ngim pat tip kaei kaba don ha ka kaiphod jong kata ka jingtohkit.”
U Bah Lahkmen u la ban jur ïa ka jingdonkam ban pynbeit noh ïa ki jingeh kiba neh slem bha hapoh ka skulbah NEHU.
