Shillong, K’Lyngkot 12
Ka Khun Hynñiewtrep National Awakening Movement (KHNAM) ka la leit ban pynkynmaw biang haba ïadei ka jingthoh ba ka la phah sha ka Ophis u Chief Executive Member (CEM) ka KHADC myn ha ka 8 tarik u Ïaiong 2025 ba ka la kyrpad ban pynkylla (Amendment) noh ïa ka AD Rule, para ba 128 (1) bad 128 (3).
Haba ïakren sha ki lad pathai khubor u Bah Thomas Passah, President KHNAM, u la ïathuh ba ka party ka la sdang ban dawa pynkylla ïa kane ka mat naduh u snem 2014, ha ki Executive Committee bad ki Chief Executive Member kiba la leit.
U la pynkynmaw ba ka party ha u snem ba la dep, ka la phah jingthoh ïa kane kajuh ka mat sha ka EC ba mynta ïa kaba la ïalam da ka Voice of the People Party (VPP). Hynrei namar ka jingbym ïoh jubab eiei na kane ka EC, ka la leit ban buddien biang sha ka EM ba peit ïa ka tnad aiñ (Law) da kaba kdew ba kane ka mat, ka dei ka mat ïakren ha kine ki sngi.
Shuh-shuh u Bah Thomas u la batai kham shai haba ïadei bad kane ka AD Rule, kaba kren shaphang u briew ne ka briew ba don ka hok ban ïoh thep vote ha ka ilekshon jong ki District Council.
“Ka AD Rule ha ka para 128 ka ong ba uno-uno u briew u bym dei Schedule Tribes (ST), katkum ka ST order 1951 ka kdew ba un ym lah ban thep ‘vote’ ha ki ilekshon District Council, hynrei u lah pat ban thep ‘vote’ lada u dei u nongshong shnong ba pura” la ong u Bah Thomas.
Nalor kata u la bynrap ba ka AD Rule para 128 (3) ka batai ba u briew uba la sah palat 12 snem u don ka hok ban ïoh thep ‘vote’ bad ban ïakhun ïa ka ilekshon District Council namar u la dei u nongshong shnong ba pura (Permanent Residents).
“Namar kata ka daw ba ngi na ka liang ka KHNAM ngi kwah ba ka Council kan pynkylla ïa kane ka aiñ, khnang ba ngin lah ban khanglad ïa ki bym dei Khasi, ba kin ïoh thep ‘vote’ bad ban ïakhun ïa ka ilekshon District Council” la ong u Bah Thomas.
U Bah Thomas u la ban jur bad kyrpad ïa ka District Council ba kan weng noh ïa ka para 128 (3) bad dei ban bujli noh, ba tang uba dei na ka jaitbynriew Khasi u ba lah ban ïoh thep ‘vote’ bad uba lah ban ïakhun ïa ka ilekshon MDC, khnang ban lah ban ïada ïa ka jinglong kyrpang jong ki District Council namar ba ka Sixth Schedule ka dei ka ban ïada ïa ka jinglong kyrpang jong ka jaitbynriew.
