Tura, K’Lyngkot 12
Haba bteng ïa ka jingthwet ïa kito kiba donkti ban pynïap ïa u dkhot ka ACHIK, u Dilseng Sangma, ki pulit ka West Garo Hills (WGH) ha ka Sngi U Blei, ki la ïoh ban kem sa ïa uwei uba suba donkti ha kane ka kam, bad ka jingdon jong baroh kiba la shah kem haduh mynta ka la kiew sha ka 4 ngut.
Hadien ka jingjia ha ka 9 tarik u Kyllalyngkot ha kaba ki dkhot ka ACHIK ki la leit ban jurip bad khang khyrdep ïa kawei ka par maw ba treikam be-aiñ bad shah thombor ha ka kynhun ki runar, ka thaiñ baroh kawei ka don hapdeng ka jingkhih khuslai ïoh mih kano-kano ka jingïakynad jaidbynriew.
Hynrei ka jingshimkhia kloi jong ki pulit ka distrik kaba la ïalam sha ka jingshah kem jong lai ngut kiba suba donkti bad ka jingpynlong ïa ki jingïalang ïasuk ha Tura, Phulbari bad Rajabala, la lah ban tehlakam noh ïa ka jinglong-jingman. Hynrei u trai jong kata ka par maw ba treikam be-aiñ u dang phet rieh hadien ba u la phet krad hashuwa ba ki pulit kin poi ha ïing jong u.
Ki tyllong khubor na ki pulit ka distrik ki ïathuh ba ki dang pynlong ïa ka jingkhynra bad ki dang talasi ban pyntikna ba baroh kiba donkti ha katei ka jingthombor bad jingpynïap briew (kaba jia hadien kata), kin shah pynngat ha ki kyndon aiñ.
