Shillong, K’Lyngkot 12
Ki pulit ryngkat bad ki dkhot jong ka VDP ka shnong Soo Kilo ha East Jaiñtia Hills ki la ïoh ban kurup noh ïa u drok ryngkat bad ki thyrnia na ka met jong uwei u samla.
Katkum ka khubor kaba la ïoh na ka website jong ki pulit la ong ba ha ka 8 tarik mynta u bnai, hadien ka jingïoh ïa ka jingtip kaba bniah, ki pulit ryngkat bad ki dkhot VDP ka shnong Soo Kilo ki la bat noh ïa kawei ka kali Maruti Alto 800, kaba don ïa u registration number ML06-A-0621 kaba la ñiah da u Kheinkor Mulliar ba ju khot sin u Khein (23 snem) hapoh ka shnong.
La ong ba na une u samla ki pulit ki la ïoh ban kurup ïa u drok uba suba ba u dei u heroin uba khia kumba 1.37 gram bad haduh arphew san tylli ki thyrnia na ka met ka jong u. Na ka liang jong ki pulit ki la kurup noh ruh ïa katei ka kali.
Ha kawei pat ka khubor, u Coy Commander, C-Coy jong ka 4th Bn., BSF ka BOP Muktapur ha West Jaiñtia Hills u la ai ka jingujor da ka ktien ba ha ka 9 tarik mynta u bnai, ki shipai BSF ki la ïoh kurup noh haduh san tylli ki masi, ïa kiba la thmu ban khaïi tuh sha Bangladesh na ka jaka kaba don marjan bad ka BP No. 1287/6-S.
