Shillong, K’Lyngkot 12
Kawei ka durkhih kaba la paw bad saphriang ha ki rynsan social media ha kaba u wei u briew ïa uba la kynnoh ba u dei u Home Guard Volunteer jong ki Traffic u la dawa pisa na ki briew kiba don hapoh ka kali kum ka bai kuna (Fine) da kaba kynnoh ba ki thmu ban phet krad na kane ka kali.
Kane ka durkhih ka dei kaba la saphriang ha ka 12 tarik u Kyllalyngkot 2026, ba la pynmih hapoh ka Youtube Channel ba la ai kyrteng ‘Karan Goala Expii’.
La ïoh jingtip ruh ba kane ka jingjia kadei ha ki thaiñ Umpling, Shillong.
Katkum ka durkhih la ïoh sngew ba une u Home Guard u la pan ka bai kuna na kitei ki briew hapoh ka kali da ki lak tyngka.
U ne u pulit Home Guard u la kynnoh ruh ba kine ki briew ki la thmu phet da kane ka kali.
Katkum ka durkhih kaba la paw bad saphriang ha ki rynsan social media, la ïohi ba kine ki briew kiba shah dawa pisa ha u tei briew ba la kynnoh ba u dei u Home Guard ki dei na Silchar, Assam.
Watla kine ki briew kiba don hapoh katei ka kali ki la kyrpad ban siew tang kumba T.10 hajar hynrei une u Home Guard um treh, da kaba byrngem ba lada kim lah ban siew un ïalam beit sha thanad.
Une u Home Guard u la byrngem ruh ha ryngkat ki ktien khlemakor bad katkum ka durkhih, la paw ba kine ki briew watla ki la kyrpad ruh um shym la sngap bad la sngewthuh ba la ïa beit ha ka dor kaba T.17 hajar.
