Shillong, K’Lyngkot 12
U Superintendent of Police ka East Khasi Hills District, u Bah Vivek Syiem u la pynmih ïa ki jingmana ïa ki nongñiah kali kiba kidei ban bud ryntih katkum ka aiñ.
Ha kaba ïadei bad ki rukom pynïeng kali, U SP u la mana ïa ki nongñiah kali ba kin kohnguh ïa ki hukum ba la bthah ban ym pynïeng kali ha ki jaka ba la khang bad lada pynkheiñ ïa kata kin shah daiñ kuna T.500, T.1500 haduh T.2000 lane yn shah rah ïa ki kali jong ki.
U la pynbna ruh ba ïa ki kali taxi kamai bad ki kali kamai Tourist la mana ban pynïeng ha ki rud surok, ne ki jaka ba la khang ban pynïeng kali bad kino-kino kiba leh pyrshah ïa kane kin shah daiñ kuna T.500 bad T.1,500 haduh T.2,000.
Ha ka jingpynbna u SP u la kyntu ïa ki kali bad ki ar shaka ban ym pynher sted bad tam pud ne overtake khamtam ha ki jaka kiba khim bad ha ki surok ba khun, bad kidei ban ïaid ha ka jaka ba dei ban ïaid ym ban niah sted ne ñiah ha ka rukom kaba ima ka ba lah ban wanrah ka jingmynsaw. U la kyntu ruh ïa Ki nongñiah kali ba kin bud ryntih man ka por ïa ki jingbthah lyngba ki ‘traffic signal’ bad lada lap ïa kiba pynkheiñ yn shah daiñ kuna T.2000, T.5000 haduh T.10,000.
Na ka bynta ki kali kit skum bad ki kali ba kit palat pud, la mana ba kidei ban tap bha ïa ki mar ba ki kit bad lada pynkheiñ ïa kane yn shah daiñ kuna 2000 tyngka.
Na ka bynta ki ba buaid ryngkat ka ñiah kali, la mana tyngeh ban daiñ kuna T.10 hajar ne yn shah set along 6 bnai ne kin shah ngat lang ha baroh ar jait kitei ki jingpynshitom lada ki ñiah kali bad dih palat pud ïa kaba la buh ban dih. Ki nongñiah kali kim dei ban dih palat ïa ka 30mg na ka 100 ml.
Haba ïadei bad kane u SP u la kyntu ïa baroh ki trai kali ne ki nongñiah kali ban ïatreilang bad ki pulit pynïaid kali na ka bynta ka jingshngaiñ, ka jingïaid beit bad ka jinglong ryntih ka rukom pynïaid kali bad lada pynkheiñ kin shah pynshitom katkum kitei ki kyndon ba la buh lyngba ka Motor Vehicles Act.
