Hyderabad, K’lyngkot:
Ha ka sienjam kaba nyngkong eh ha ka ri, ki pulit ka Hyderabad ha ka sngi Thohdieng ki la plie paidbah ïa ka Cyber Mitra (C-Mitra), ka jaka ai jingïarap ba shisha kaba thmu ban ïarap ïa ki briew kiba la shah ktah ha ka kam thok ha ka kor kompiwtor ban ujor ïa ki ejahar khlem da leit sha thanat pulit.
Hapoh ka rukom treikam kaba la don lypa, ki lanot kiba ujor ha ka national cybercrime portal (cybercrime.gov.in) ki dei ban leit sha thanat bad ai ïa ki jingtip ba bniah na ka bynta ban pynrung kyrteng ejahar. Da ka jingwanrah jong u C-Mitra, ki nongujor hapoh u pud u sam jong ki pulit ka Hyderabad kin ym donkam shuh ban leh ïa kane ka jingleit jngoh.
Hadien ba la ujor ha ka cyber crime portal, ki heh jong ka C-Mitra kin sa ïakynduh ïa u ne ka lanot ban lum ïa ki jingtip ba kham bniah. Da kaba pyndonkam ïa ka AI, ka kynhun jong ka C-Mitra kan pynkhreh ïa ka Draft jingujor katkum ki jingtip ba la ai bad phah sha u nongmudui.
Ki lanot ki dei ban shim ïa ka Printout jong ka Draft FIR, ban soi ïa ka, bad ai sha ki pulit da ka Post lane Courier, lane ban thep da lade ha ka Cyber Mitra helpdesk kaba don ha Cybercrime police station ha Basheerbagh.
Shisien ba la ïoh ïa ka jingujor ba la soi, ki ophisar kin ujor ïa ka Zero FIR bad kin rah ïa ka mukotduma sha thanat pulit kaba don ïa ka bor bishar. U Commissioner of Police ka Hyderabad V C Sajjanar u la ïathuh ha ki nongthoh khubor ba ka rukom “Virtual Police Officer” ka pyndonkam ïa ka teknoloji ban wanrah ïa ka kam pulit kham jan sha ki nongshong shnong.
Katkum ka jingong jong ki pulit, ka jingpynrung kyrteng markhmat ïa ka FIR ka shim por kumba lai kynta. Ka jingthmu jong ka C-Mitra ka long ban pynduna ïa ka por jong ki nongujor bad ban ailad ïa ki nongtrei jong ki thanat pulit ban pynleit jingmut ha ka jingtohkit. Kumba ka long mynta, tang 18% na ki jingujor ba la ïoh lyngba ka helpline’1930′ bad ka Portal jong ka ri la pynkylla sha ki FIR. Ka tnad ka la buh thong ban ïoh ïa ka jingkylla kaba mut 100% lyngba ka C-Mitra.
Ki heh sorkar ki la ïathuh ba ki jingkhot na C-Mitra kin sdang tang na u number landline 040-4189-3111. Ïa ka jingïakren WhatsApp yn phah tang na ki number kiba sdang na u 87126 series.
Ki pulit ki la pynshai ba ka C-Mitra ka treikam tang kum ka jaka pynsuk ban pynrung kyrteng FIR. Kam pynlong ïa ki jingtohkit, kam ai jingmut ha ka liang ka aiñ, ne pynthikna ban ïoh biang ïa ka pisa kaba la jah.
