Chennai, K’lyngkot:
U Myntri Rangbah ka jylla Tamil Nadu u MK Stalin ha ka sngi Saitjaiñ u la ong ba ka DMK bad ka kynhun jong ka ki sngewskhem ban ïoh ïa ka jingjop kaba khraw ha ka ilekshon Ïingdorbar Thawaiñ ban wan, bad lehse ban jop palat 200 tylli ki seat, da kaba kdew ïa ka jingtrei kaba jylliew jong ka seng bad ka jingsynshar ha kine ki saw snem shiteng ba la dep.
Haba kren ha ka jingïalang rakhe ïa ka Pongal ba la pynlong da ka Anitha Achievers Academy ha Kolathur, u Myntri Rangbah u la ong ba wat ki nongïalam bad ki nongtrei na ki seng ba ïakhun pyrshah, kynthup ïa ka BJP, ki la kubur ïa ka jingkhlaiñ jong ka seng bad ka akor treikam jong ka DMK.
U la ong ba ka jingpyrshang jong ki dkhot ka DMK kam shym la kut tang ha Kolathur, hynrei ka la pur sha kylleng ka Tamil Nadu.
“Mynshwa nga la ong ba ka kynhun synrop jong ngi kan jop ym duna ïa ka 200 seat. Hynrei haba peit ïa ki kam kiba phi la leh haduh mynta nga sngewskhem mynta ba ngin ïaid lait ïa kata ka jingkheiñ”, u la ong.
U Stalin u la ong ba ka sorkar Dravidian Model ka la pyntreikam ïa ki katto katne ki skhim jingïarap bad ka la ïoh ïa ki mawjam kiba kongsan naduh ba ka la shimti ïa ka kam ha u bnai Jymmang, 2021. “Ngam donkam ban batai ïa ki jingjop jong ngi sha phi.Hynrei ka dei ka kamram jong phi ban shim ïa ki na ka bynta ki paidbah, u la ong ha ka kynhun jong ki nongbud ka seng CMK bad ki nongkyrshan.
Haba pynpaw ba ïa kane ka jingïalang Pongal la pynlong ban pynkhlaiñ bad pynshlur ïa ki nongtrei jong ka seng, u Stalin u la ong ba ki (DMK) ki la dep ban pyndep haduh 50% na ki kam kiba donkam na ka bynta ka ilekshon, bad ïa ka shiteng kaba sah yn pyndep ha ki bnai ban wan.
“Ïa kane ka jingïalang la pynbeit ban ai mynsiem ïa phi bad ban pynkhreh ïa phi na ka bynta ka bynta kaba bud jong ka thma saiñ hima sima,” u la ong.
Haba ai khublei Pongal ïa kiba la don lang, u Stalin u la kyntu ïa ki nongtrei jong ka seng ban shim ïa ka jingkular ban pynthikna ïa ka jingjop kaba khraw na ka bynta ka kynhun synrop ha ka ilekshon ban wan bad u la pynkut ïa ka jingkren jong u da ka jingshaniah bad jingkyrmen.
