Shillong, K’Lyngkot 13
U Superintendent of Police ka East Khasi Hills District, u Bah Vivek Syiem u la pyntip ba ka tnad Pulit ka dang pynlong ïa ka jingtohkit kaba bniah halor ka jingïap u Bipul Inghi, uba dei u nongtrei casual ha North Eastern Hill University (NEHU).
Kane ka jingshimti ban tohkit bniah ka long hadien ba ka longïing jong u Bipul ka la suba ba don kaei-kaei sha lyndet halor ka jingïap une u samla namar ki dak mong ha ka met jong u, ong u Bah Vivek.
Haba kren sha ki lad pathai khubor ha ka sngi Ba-ar jong ka taïew, u Bah Vivek Syiem u la ïathuh ba kane ka jingjia ka dei ha ka 06 tarik u Kyllalyngkot 2026, kumba ha ka por 7:30 janmiet. “U Bipul Inghi, u trei kum u Security Guard naduh u snem 2011 bad mynta u trei ha ka School of Technology”, u la ong.
U la ïathuh ruh ba ha katei ka sngi ba jia kane ka jingjia u Bipul Inghi u leit ban ïadon bynta lang ha kawei ka jingleh sngewbha ryngkat bad ki paralok nongtrei jong u na NEHU.
La ïathuh ba ha katei ka jingleh sngewbha, u Bipul u la mynsaw jur kaba la pynlong ïa ki ban pynkit ïa u sha Supercare Hospital ha ka sngi kaba bud. Wat lada la pyrshang ban ai ka jingsumar hynrei, u la khlad noh ha ka 8 tarik u Kyllalyngkot 2026.
“Ka jingmih ka jingsuba ka long hadien ba ïa ka met jong u la pynkit sha la ïing ha Khulia, Ri-Bhoi District. Ki bahaïing hasem ki la lap ïa ki jingmong ha ka met jong u kaba pynsuba jur ba ka jingïap jong u kam dei kaba jia na ka jingkyllon kaba kynsan , hynrei ka lah ban don eiei sha lyndet,” la ong u Bah Vivek.
U Bah Vivek u la ïathuh ba haduh mynta ki pulit ki dang ap ïa ka kaiphod Post Mortem kaba na Nongpoh.
“Ngim pat lah ban pynshisha la ka dei ka jingïap kaba jia ryngkhat (accidental) ne ka jingïap kaba don kti da u briew (homicidal). Baroh ka shong ha ka kaiphod jong ka Post Mortem bad ka jingphla jong kito kiba don lang ha katei ka sngi,” la bynrap u Bah Vivek Syiem.
Ka tnad pulit ka la dep ban shim ïa ki jingphla na ki paralok jong u kiba don lang ha katei ka jingkhawai. “Lada ka kaiphod Post Mortem ka pynshisha ba don kti u briew, ki pulit kin sa pynngat ïa kane ka kam hapoh ki kyndon aiñ kiba kham pyrkhing ban tohkit ïa kito kiba donkti,” ong u Bah Vivek.
