Shillong, K’Lyngkot 13
Hapdeng ka jingkhriat ka janmiet sngi Saitjaiñ, ki paidbah nongshong shnong ka Mawlai Mawroh ki la wan ban ïashimbynta shitrhem ha ka jingrakhe pynkut ïa ka Winter Games kaba la kut hapdeng ka jingphuh jingphieng.
Kum ban shu kdew, ka Dorbar Shnong Mawlai Mawroh ka la sdang ïa kane ka jinglehkmen Winter Games naduh ka 6 tarik u Nohprah 2025 da ka jingthmu ban lum ban lang bad ban wanrah ïa ka jingïajan, ka jingïa-ithuh ithaw bad ka jingïatylli hapdeng ki para nongshong Shnong.
Ka Dorbar Shnong ha ka jingïatrei ryngkat ka Seng Samla Mawlai Mawroh lyngba ka Winter Games ka la pynlong bunjait ki jait jingïalehkai da ka jingthmu ban kyntiew bad ban btin lynti ïa ki khun samla jong Shnong, khamtam ba kin lait na ki jingmlien ba sniew.
Ha kane ka jingïalang ka la don ka jingïakop Miss & Mr Mawroh ha kaba ki thei bad ki rang ki la ïashimbynta. Ïa ka Miss Mawroh la ïohrah da ka samla Ilasara Thongni bad ïa u Mister Mawroh la ïoh da u samla Maïanborlang L. Nongpiur.
Ha kane ka sngi ba pynhap pyrda ïa ka Winter Games jong ka Dorbar Shnong Mawlai Mawroh la wan ban long kongsan da u Myntri ka tnad Sports & Youth Affairs u Bah Wailadmiki Shylla ha ka jingïadon ryngkatlang u rangbah shnong u Bah H.B.R Lyngdoh, ka Kong Roshan Warjri Myntri Sorkar barim, u President ka Seng Samla Mawlai Pyllunm, u Bah Samuel Buiam ki nongïalam ka seng longkmie bad ki paidbah.
Haba ai jingkren ha kane ka jingïalang u Bah Wailadmiki Shylla u la ai ka jingïaroh ïa ka Dorbar Shnong bad ka Seng Samla kaba la lah ban pynlong ïa ka Winter Games kaba don ïa ka jingthmu ban kyntiew ïa ki khun samla ba hapoh ka shnong ka thaw.
Shuh-shuh u la ban jur ïa ka jingdonkam ban ai rynsan ïa ki khun samla khnang ba kin lah ban pynpaw pyrthei bad ba kin kyntiew ïa ka sap ka phong ba ki don, da kaba bynrap ba ka Sorkar Jylla ruh ka la ïai pyrshang ïa kane na ka por sha ka por.
